Андижон халқаро аэропортида аэродром реконструкциясининг биринчи босқичи якунланди, деб хабар берди Транспорт вазирлиги матбуот хизмати.
Маълум қилинишича, 15 март куни Тошкент вақти билан соат 10:30 да Андижон халқаро аэропорти Uzbekistan Airways авиакомпаниясининг Тошкент—Андижон йўналиши бўйича биринчи техник рейсини қабул қилди.
Uzbekistan Airports акциядорлик жамияти 2023 йилнинг 23 март куни “Андижон халқаро аэропорти” МЧЖни аэродром қопламасини реконструкция қилиниши учун ёпилиши ва парвозларни тўхтатилиши тўғрисида буйруқ чиқарганди. Мазкур буйруққа асосан, Андижон халқаро аэропорти 2023 йилнинг 1 апрель санасидан бошлаб, аэродром қопламасини реконструкция қилиниши туфайли авиапарвозлар учун вақтинча ёпилган.
2023 йилнинг сентябрида аэропортда янги аэродром мажмуаси қурилишининг биринчи босқичи бошланган эди.
“Лойиҳа 2023-2024 йиллар давомида амалга оширилади. Лойиҳанинг амалга оширилиши минтақада туризмни ривожлантириш ва инвестицион муҳитни яхшилашга хизмат қилади”, дейилган эди хабарда.
Изоҳ (0)