Andijon xalqaro aeroportida yangi aerodrom majmuasi qurilishining birinchi bosqichi boshlandi, deb xabar beradi Uzbekistan Airports matbuot xizmati.
Rekonstruksiya doirasida yangi aerodrom majmuasi, jumladan, uzunligi 3400 metr va eni 60 metr bo‘lgan uchish-qo‘nish yo‘lagi, yurish yo‘laklari, samolyotlar uchun yettita to‘xtash joyiga ega perron qurilishi ko‘zda tutilgan. Shuningdek, aerodrom majmuasida barcha turdagi havo kemalarini tungi vaqtda va og‘ir ob-havo sharoitida qabul qilish/jo‘natish imkonini beruvchi ICAO ikkinchi (CAT-II) toifali zamonaviy yoritish moslamalari o‘rnatiladi.
Aeroportning mavjud uchish-qo‘nish yo‘lagi uzunligi 2985 metr va eni 44 metr bo‘lib, yo‘l qoplamasining yuk ko‘tarish qobiliyati pastligi, shuningdek, zamonaviy yoritish tizimining yo‘qligi sababli ko‘plab turdagi samolyotlarni qabul qilishda va tunda faoliyat olib borishda cheklovlar mavjud edi.
“Loyiha 2023-2024-yillar davomida amalga oshiriladi. Loyihaning amalga oshirilishi mintaqada turizmni rivojlantirish va investitsion muhitni yaxshilashga xizmat qiladi”, — deyiladi xabarda.
Uzbekistan Airports aksiyadorlik jamiyati 23-mart kuni “Andijon xalqaro aeroporti” MCHJni aerodrom qoplamasini rekonstruksiya qilinishi uchun yopilishi va parvozlarni to‘xtatilishi to‘g‘risida buyruq chiqargandi. Mazkur buyruqqa asosan, Andijon xalqaro aeroporti joriy yilning 1-aprel sanasidan boshlab, aerodrom qoplamasini rekonstruksiya qilinishi tufayli aviaparvozlar uchun vaqtincha yopilgan.
Izoh (0)