Афғонистон ва Покистон ўртасидаги асосий чегара ёпилгач, минглаб юк машиналари ўтиш жойида тўхтаб қолди

Афғонистон ва Покистон ўртасидаги асосий чегара пункти “Topxам” уч кундан бери ёпиқ, минглаб юк машиналари чегарада ушланиб қолган, деб хабар бермоқда The News нашри.

“Толибон” ҳукумати 19 февраль куни Покистон ва Афғонистон ўртасидаги саёҳатчилар ва юкларнинг асосий транзит давозаси “Topxам”ни ёпиб қўйди.

“Покистон ва Афғонистон ўртасидаги чегара пунктининг ёпилиши икки давлат савдогарларига зарар етказмоқда. Чегаранинг икки томонида оғир юк машиналарининг узун навбатлари пайдо бўлди. Савдогарлар, айниқса, мева-сабзавот сингари янги узилган маҳсулотларни етказиб берувчилар йўқотишларга учрамоқда, чунки юк машиналари сўнгги уч кундан бери йўлда қолиб кетган”, — деди Покистон—Афғонистон савдо-саноат палатаси директори Зиё-ул-Ҳақ Сарҳадий.

Унинг сўзларига кўра, икки томонда 6 мингтагача юк машинаси тўхтаб қолган. Ҳар икки томон расмийлари муаммони ҳал қилиш учун музокаралар олиб бораётганини айтишган бўлса-да, дарвозанинг ёпилиши сабаби тўлиқ маълум эмас.

Ziaul Haq Sarhadi, a member of Pakistan-Afghanistan Joint Chambers of Commerce, said that over 6000 trucks have been stopped on both sides of Torkham border.

According to Sarhadi, closure of Torkham border between Afghanistan and Pakistan has caused heavy losses to the traders. pic.twitter.com/2yNz3BesEF

— Afghanistan International English (@AFIntl_En) February 21, 2023

Сарҳадийнинг айтишича, Афғонистондаги аҳолининг аксарият эҳтиёжларини қондириш учун Покистон товарлари керак, қолаверса, кўплаб юк машиналари Афғонистондан транзит пункти сифатида Марказий Осиёга ҳам йўл олганди. Бошқа кичикроқ чегара ўтиш жойларидан фойдаланиш варианти юк машиналари ҳайдовчилари томонидан хавфли деб ҳисобланмоқда.

Хабарларга кўра, Покистон ҳукумати афғонистонлик беморга ҳамроҳлик қилаётганлардан мамлакатга кириш учун қонуний ҳужжатларни сўрагач, Афғонистон ҳукумати “Topxам”даги чегарани ёпиб қўйган. Афғонистон фуқароларидан сафар учун ҳужжат олиб юришни талаб қилиш, умуман олганда, хавфсизликни кучайтириш қарори Пешоварда полицияга қилинган террор ҳужумидан кейин қабул қилинган.

20 февраль куни “Topxам” атрофида Покистон ҳарбийлари ва “Толибон” жангчилари ўртасида қуролли отишма юз берди. Ижтимоий тармоқларда чегарада ўқ овозлари эшитилиб турган видеолар тарқалди.