Афғонистоннинг Покистондаги элчихонаси вакиллари армиянинг Равалпиндидаги бош қароргоҳига чақирилди, у ерда Покистонга қарши террорчилик ҳужумларини ташкил қилишда уларнинг мамлакати ҳудудидан фойдаланганлик учун норозилик билдирилди. Бу ҳақда Покистон армияси матбуот хизмати раҳбари генерал майор Асиф Гафур маълум қилди, деб ёзади «ТАСС».
Бундай чора кўрилишига Синд провинциясининг Сехван шаҳридаги сўфийлар масжидида содир этилиб, 74 кишининг ўлимига ва 300 кишининг жароҳатланишига олиб келган теракт сабабчи бўлган.
Терактдан сўнг Покистон армияси штаб бошлиғи генерал Камар Жавед Бажва Исломободнинг мамлакатга ёғилган террор тўлқинига жавоб қилиш нияти ҳақида эълон қилди. Покистон томони даъво қилишича, теракт учун жавобгар жангарилар Афғонистон ҳудудида туриб ҳаракат қилган.
Афғонистонлик дипломатларга, шунингдек, Исломобод томонидан қидирилаётган, Афғонистонда яширинаётган 78 террорчининг рўйхати берилди ва Қобул уларни Исломободга зудлик билан топшириши ёки ўзи кўрсатилган шахсларга нисбатан тегишли жазо чораларини кўриши талаб қилинди.
Эслатиб ўтамиз, аввалроқ Покистон-Афғонистон чегараси хавфсизлик юзасидан ёпиб қўйилган эди.
Изоҳ (0)