АҚШ президенти матбуот котиби Карин Жан-Пьер “Толибон” ва Покистон ҳукумати ўртасидаги келишмовчиликни мулоқот йўли билан ҳал қилишга чақирди. Бу ҳақда Etilaatroz хабар берди.
Покистон 18 март куни Афғонистоннинг икки вилоятида ҳаво ҳужумлари уюштирган эди. Карин Жан-Пьер бу Покистоннинг ҳарбий постларидан бирига уюштирилган ҳужумга жавобан амалга оширилганини айтди. 16 март куни Покистоннинг Мир Али шаҳрида амалга оширилган ҳужумда етти нафар покистонлик аскар ҳалок бўлганди.
Оқ уй матбуот котиби Покистоннинг Афғонистонга уюштирган ҳужумларида тинч аҳоли қурбон бўлганидан афсусда эканини айтиб, “Толибон” террорчилик ҳаракати Афғонистондан амалга оширилмаслигини таъминлаши шарт, деди.
Шунингдек, у Покистондан сабр-тоқатли бўлишни ва терроризмга қарши курашда тинч аҳолига зарар етказмасликни сўради.
Ҳар икки томон ҳам ҳар қандай келишмовчиликни мулоқот орқали ҳал қилишини истаймиз, — деди Карин Жан-Пьер.
У АҚШ Афғонистон террорчилар учун хавфсиз бошпана бўлиб қолмаслигини таъминлаш тарафдорилигини билдирди. АҚШ Давлат департаменти матбуот котиби ўринбосари Ведант Пател ҳам Покистоннинг Афғонистонга ҳаво ҳужуми ҳақида шундай баёнотлар бериб, қурбонларни минималлаштириш чораларини кўриш муҳимлигини айтди.
Бироқ у Покистонни Американинг муҳим ва асосий ҳамкори деб атади ҳамда у билан мунтазам мулоқотда эканини айтди.
Покистоннинг Афғонистонга ҳужуми
Покистон армияси 18 март куни эрталаб Афғонистоннинг Пактика ва Хост вилоятларидаги чегара ҳудудларини бомбардимон қилди. Ҳужумда “Покистон Толибони” нишонга олингани айтилди, бироқ “Толибон” саккиз нафар аёл ва бола ҳалок бўлганини маълум қилди.
“Толибон” Мудофаа вазирлиги ҳужумларига жавобан Дуранд чизиғи бўйлаб Покистон ҳарбий марказларига ҳужум қилган. Покистон ТИВ мамлакатдаги ҳужумларнинг асосий нишони Ҳофиз Гул Баҳодур гуруҳига алоқадор “террорчилар” эканини айтди.
Покистон сўнгги икки йил ичида “Толибон”га Афғонистонда террор гуруҳлар, жумладан, “Покистон Толибони” борлигидан хавотирларини бир неча бор етказган. Ушбу террорчилар Покистон хавфсизлигига жиддий таҳдиддир ва Афғонистон ҳудудидан доимий равишда Покистон ҳудудида терактлар уюштириш учун фойдаланган, — дейилади Покистон ТИВ баёнотида.
Шунингдек, вазирлик “Толибон”дан Афғонистон Покистонга қарши террорчилик базасига айланишининг олдини олиш учун аниқ ва самарали чоралар кўришни, “Покистон Толибони”га хавфсиз бошпана бермасликни сўраган.
“Толибон” ҳокимияти тепасида турган айрим элементлар “Покистон Толибони”ини фаол қўллаб-қувватлаб, улардан Покистонга қарши фойдаланади, — дея қўшимча қилди вазирлик.
Изоҳ (0)