Уч муҳофаза этиладиган табиий ҳудудлар майдони кенгайтирилди, деб хабар бермоқда Экология вазирлиги.
Унда айтилишича, Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Муҳофаза этиладиган табиий ҳудудлар департаментига қарашли “Нурота” ва “Сурхон” давлат қўриқхоналари ҳамда “Зарафшон” миллий табиат боғи ҳудуди кенгайтирилди. Бу ҳақда Ўзбекистон Республикаси Вазирлар Маҳкамасининг 2025 йил 10 мартда қабул қилинган “Давлат қўриқхоналари ва миллий табиат боғи ҳудудларини кенгайтириш бўйича қўшимча чора-тадбирлар тўғрисида”ги қарорида белгиланди.
Қарорга кўра, “Нурота” давлат қўриқхонаси ҳудуди Фориш туманидаги захира ерлардан 1173,1 гектар, Фориш давлат ўрмон хўжалигининг 270 гектар, Ветеринария ва чорвачиликни ривожлантириш қўмитасининг Самарқанд вилояти Қўшработ тумани Пангат ҳудудидаги 1657,41 гектар ва Пайариқ туманининг Халқобод ҳудудидаги 1165,46 гектар ер майдонлари ҳисобидан 4265,97 гектарга кенгайтирилиб, умумий ер майдони 22 017,97 гектарга етказилди.
Шунингдек, “Зарафшон” миллий табиат боғи ҳудуди Булунғур туманидаги захира ерлардан 275,58 гектар ва Жомбой давлат ўрмон хўжалигининг 42,34 гектар, Ургут ихтисослаштирилган давлат ўрмон хўжалигининг 278,78 гектар, Тойлоқ туманидаги Дарғом давлат ўрмон ишлаб чиқариш корхонасининг 262,1 гектар, Тойлоқ туманидаги захира ерлардан 1808,79 гектар ва Жомбой туманидаги захира ерлардан 140,02 гектар ер майдонлари ҳисобидан 2 807,61 гектарга кенгайтирилиб, умумий ер майдони 5 234,01 гектарга етказилди.
Бундан ташқари, Сурхондарё вилояти Шеробод туманидаги Қизириқ давлат ўрмон хўжалигининг 249 гектар ер майдонлари ҳисобидан “Сурхон” давлат қўриқхонаси ҳудуди кенгайтирилиб, умумий ер майдони 24 051 гектарга етказилди.
“Нурота” ва Сурхон давлат қўриқхоналарининг асосий майдонига туташ 17 145,2 гектар ва 16 446 гектар ер майдонлари қўриқланма зоналар этиб белгиланди. Мазкур қарор муҳофаза этиладиган табиий ҳудудлар майдонини кенгайтириш орқали мавжуд ноёб турдаги ўсимлик ва ҳайвонларни муҳофаза қилиш самарадорлигини оширишга хизмат қилади.
Маълумот учун, сўнгги йилларда экологик тизимни яхшилаш ва биохилмахилликни сақлаш мақсадида амалга оширилган ишлар натижасида муҳофаза этиладиган табиий ҳудудлар ер майдони республика умумий майдонининг 14,2 фоиздан ортиқроғини ташкил этмоқда. Аввалроқ иккита давлат қўриқхонасининг 61 359,89 гектар ер майдонидан иборат қўриқланма зоналари белгиланган эди.
Изоҳ (0)