Франция—Ўзбекистон бизнес-форумида 20 дан ортиқ битим ва шартномалар имзоланди

Парижда 11 март куни Ўзбекистон ва Франциянинг тегишли вазирликлари, идоралари раҳбарлари ҳамда 100 га яқин етакчи компаниялари, молия ва бизнес ташкилотлари раҳбарлари иштирокида Франция—Ўзбекистон бизнес-форуми бўлиб ўтди.

Инвестициялар, саноат ва савдо вазирлиги матбуот хизматининг маълум қилишича, Шавкат Мирзиёевнинг Францияга ташрифи арафасида бўлиб ўтган форум якунлари бўйича қишлоқ хўжалиги, энергетика, яшил иқтисодиёт, шаҳарсозлик, сув таъминоти ва транспорт, кончилик, соғлиқни сақлаш, таълим ва бошқа соҳалардаги ҳамкорликни янада ривожлантириш ва лойиҳаларни амалга оширишни белгилаб берувчи 20 дан ортиқ битим ва шартномалар имзоланди.

Тадбирда сўзга чиққан инвестисиялар, саноат ва савдо вазири Лазиз Қудратов бизнес-форумнинг икки томонлама муносабатларни мустаҳкамлаш ва  иқтисодий ҳамкорликни кенгайтиришнинг янги имкониятларини ўрганиш учун ўзига хос мулоқот майдони сифатидаги аҳамиятини юқори баҳолади. Савдо-иқтисодий ва сармоявий ҳамкорликнинг барқарор динамикаси қайд этилди.

Лазиз Қудратов муносабатларни чуқурлаштириш учун фойдаланилмаган катта имкониятларга тўхталар экан, ҳамкорликни янада ривожлантиришнинг қатор йўналишларини, жумладан, транспорт ва логистика жиҳатидан ўзаро боғлиқлиқни ривожлантириш, савдо йўлакларини диверсификация қилиш ва геология-қидирув ишларини олиб бориш, шунингдек, Ўзбекистон эҳтиёжларига мослаштирилган француз технологияларини жорий этиш орқали инновацион ривожланиш муҳимлигини таъкидлади.

Шу билан бирга, инвесторлар манфаатларига жавоб берадиган ва мамлакат иқтисодиётини сифат жиҳатидан ўзгартириш ва барқарорлигини оширишга қаратилган янги қўшма ташаббусларни қўллаб-қувватлашга тайёрлик билдирилди.

Форумда сўзга чиққан MEDEF International раиси ва “Orano” компанияси директорлар кенгаши раиси Клод Имовен Ўзбекистонда амалга оширилаётган ислоҳотларни юқори баҳолади ва француз бизнеси вакилларини Ўзбекистон бозорида фаол кириб боришга чақирди.

Форум доирасида B2B ва G2B форматидаги учрашувлар ташкил этилиб, икки мамлакат ишбилармон доираларига ўзаро мулоқот қилиш ва ҳамкорликнинг янги йўналишларини ўрганиш учун яхши имконият бўлди.

Ўзбекистон ва Франция ўртасидаги савдо-иқтисодий ҳамкорлик

2024 йилда икки давлат ўртасидаги товар айирбошлаш ҳажми 1,1 миллиард долларга етди, бу олдинги йилга нисбатан 14 фоизга кўпдир. Шу билан бирга, Ўзбекистондан Францияга экспорт ҳажми қарийб икки баравар ортиб, 800 миллион долларни, импорт эса 330 миллион долларни ташкил этди.

Бугунги кунда Ўзбекистонда 50 дан ортиқ француз компанияси муваффақиятли фаолият юритиб, ривожланаётган ишбилармонлик муҳитига ўз ҳиссасини қўшмоқда.

Ўзбекистонда энергетика, инфратузилма, атроф-муҳитни муҳофаза қилиш, авиация, озиқ-овқат маҳсулотлари ишлаб чиқариш ва туризм соҳаларида ўз тажрибасини олиб кираётган дунёга машҳур Orano, SUEZ, Veolia, Total Energies, Voltalia, EDF, Lactalis, Airbus, MND ва бошқа кўплаб компаниялар бор.

10 март куни Парижда “Илм-фан ва таълим: Ўзбекистон — Франция кўприги” мавзусидаги қўшма конференция ўтказилгани ҳақида хабар берилган эди. Унда олий таълим, фан ва инновациялар вазири Қўнғиротбой Шарипов, Франция олий таълим ва тадқиқотлар вазири Филипп Батист, икки давлатнинг 30 нафардан ортиқ ОТМлари раҳбарлари иштирок этди.