Тошкентда маданий мерос объекти ёнида ноқонуний қурилиш тўхтатилди, деб хабар бермоқда Маданият ва санъатни ривожлантириш жамғармаси.
Келтирилишича, Тошкент туманлараро иқтисодий суди Яккасарой тумани Юсуф Хос Ҳожиб кўчаси, 28-уй манзилида олиб борилаётган қурилиш ишларини тўхтатди. Даъво аризаси Ўзбекистон Маданият ва санъатни ривожлантириш жамғармаси ташаббуси билан Маданий мерос агентлиги томонидан Ўзбекистон амалий санъат музейига таҳдид солаётган қонунбузарликлар сабабли киритилди.
Қайд этилишича, музей муҳим маданий мерос объекти ва Тошкент модернизмининг диққатга молик намунаси ҳисобланади. Шу сингари масканларни муҳофаза қилиш нафақат тарихни, балки шаҳарнинг меъморий қиёфасини сақлаб қолиш учун ҳам муҳим экани таъкидланди.
Бундан аввал ижтимоий тармоқларда Андижон шаҳрида жойлашган Заҳириддин Муҳаммад Бобур ҳайкалини кўчириб, ўрнига турар жой қуриш режалаштирилгани ҳақидаги хабар кенг муҳокамаларга сабаб бўлганди. Андижон вилоят ҳокимлиги ушбу хабар юзасидан муносабат билдириб, майдоннинг Бобур шоҳкўчасини боғловчи кўприк остида қолиб кетиши билан боғлади.
Маданий мерос агентлиги мазкур ҳолат юзасидан муносабат билдирди. Таъкидланишича, ҳолат юзасидан Андижон вилояти Маданий мерос бошқармаси мутахассислари томонидан ўрганиш ишлари олиб борилган. Заҳириддин Муҳаммад Бобур монументал санъат ёдгорлиги Ўзбекистон Республикаси Вазирлар Маҳкамасининг 2019 йил 4 октябрдаги 846-сонли қарори билан Моддий маданий мероснинг кўчмас мулк объектлари миллий рўйхатига киритилган.
Изоҳ (0)