2024 йил давомида йўл-қурилиш соҳасида жами 242 та объектда қарийб 17 миллиард сўмлик сифатсиз ишлар бажарилганлиги аниқланди. Бу ҳақда “Дарё”га Транспорт назорати инспекцияси матбуот хизмати маълум қилди.
Таъкидланишича, Транспорт вазирлиги ҳузуридаги Транспорт назорати инспекцияси томонидан йўл-қурилиш ишларини назорат қилиш йўналиши бўйича 2024 йил давомида жами 1785 та йўл қурилиш объектларида 2 625 та назорат ишлари ўтказилган.
Назорат қилиш ишлари натижасида жами 7 мингдан (қурилиш – 774 та, реконструкция – 1 182 та, таъмирлаш – 4 476 та, қазиш – 577 та) ортиқ қоидабузарликлар аниқланган бўлиб, уларни бартараф этиш бўйича жами 2 418 та буюртмачи, пудратчи ва қазиш ишларини бажарувчиларга бажарилиши мажбурий бўлган кўрсатмалар берилган.
Қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар бузилишларига йўл қўйган ташкилотларга бажарилиши мажбурий бўлган 351 та тақдимнома киритилган.
“Олиб борилган тизимли ишлар натижасида 242 та объектда аниқланган 17 695 млн сўмлик сифатсиз бажарилган ишларнинг ҳажмини тўловдан чиқариш бўйича буюртмачиларга талабномалар киритилди, яъни шунча маблағ асосида бажарилган сифатсиз ишларни пудрат ташкилотлари ўз ҳисобларидан амалга оширишди.
“Бугунги кунда ижро этиш муддати келган 236 та объектдаги 17 564 млн сўмлик сифатсиз бажарилган ишлар бартараф этилди. Бажариш муддати келмаган 6 та объектдаги 131 млн сўмлик сифатсиз бажарилган ишларнинг ижроси ҳудудий бўлимлар инспекторларининг назоратига олинган”, дейди инспекция матбуот котиби Фирдавс Хайриддинов.
Қайд этилишича, қонунчилик талабларини бузган мансабдор шахсларга нисбатан Маъмурий жавобгарлик тўғрисидаги Кодекснинг 99 (шаҳарсозлик тўғрисидаги қонунчиликни бузиш) ва 147 (йўлларга, йўл иншоотларига, йўл ҳаракатини тартибга солиб турувчи техник воситаларга шикаст етказиш, уларни сақлаш қоидаларини бузиш, йўл ҳаракатини ташкил этиш талабларини бажармаслик) моддаларига асосан жами 450 та маъмурий баённома расмийлаштирилиб, суд органларига юборилган.
Изоҳ (0)