Тошкент вилоятининг Бўка туманидан ўтган А373 Гулистон—Бўка—Оҳангарон йўлининг 53-километрида 17 февраль куни соат 23:00 ларда номаълум мурда ётганлиги аниқланди. Бу ҳақда Тошкент вилояти ИИББ ЙҲХБ хабар берди.
Тиббий экспертиза хулосаларига кўра, ушбу фуқаронинг шахсига ва ўлим ҳолатига автомашина уриб кетиши сабаб бўлганлиги маълум бўлди. Қочиб кетган ҳайдовчини аниқлаш юзасидан тезкор тадбир ўтказилди.
Ҳодиса содир бўлган куннинг эртаси куни гумондор ва машина топилди. Гумондор шахс 1994 йилда Сирдарё вилоятида туғилган бўлиб, ҳодисани ўзига тегишли Isuzu машинасида содир қилгани маълум бўлди.
“Қоронғи йўлда ўзимга тегишли ўнг томон йўлакда 60 тезликда кетаётгандим. Фуқаро чизиқдан сал берироқда ўтириб олганди. Олдида нарсалари сочилиб ётганди. 5 метр масофа қолганди, айланиб ўтдим, тегмади деб ўйлагандим. Қўрқиб кетдим, бақириб юбордим. Тегмади деб ўйлаб кетдим. Машинани эгасига топширдим, уйга бориб, эсласам кўзимга ёш келяпти”, дейди ҳодисани содир этган ҳайдовчи.
Ҳолат юзасидан Жиноят кодексининг 117 (хавф остида қолдириш) ва 266-моддаларига (транспорт воситалари ҳаракати ёки улардан фойдаланиш хавфсизлиги қоидаларини бузиш) жиноят иши қўзғатилиб, гумондор эҳтиёт чораси сифатида қамоққа олинди.
Содир бўлаётган ЙТҲлар
2024 йил 5 декабрь куни Тошкент шаҳрининг Мирзо Улуғбек ва Юнусобод туманларида 1,5 соат ичида ЙТҲлар содир бўлгани ҳақида хабар берилганди. Шунингдек, 6 декабрь куни Юнусобод ва Яшнобод туманларида ЙТҲлар содир бўлганди.
3 ноябрь тунда пойтахтнинг учта туманида ЙТҲ содир бўлди. Сергелида Spark ва Matiz тўқнашди, Юнусободда Lacetti йўл четидаги бетон устунга бориб урилди, Мирзо Улуғбек туманида Lacetti ва BMW тўқнашди.
11 ноябрь куни Миробод туманидаги “Санъат музейи” қаршисида Lacetti King Long автобуси орқасига бориб урилди. 16 ноябрда Яккасарой тумани Malibu йўл четидаги темир устунга урилди ва ҳайдовчиси ва йўловчиси жароҳат олди.
17 ноябрь куни Юнусобод туманида Toyota, Malibu-2 ва Cobalt автомашиналари иштирокида ЙТҲ содир бўлди. 24 ноябрь куни Мирзо Улуғбек туманида Spark ва Epica тўқнашиб, ёниб кетди. Ҳодиса оқибатида ҳалок бўлганлар йўқ.
Мирзо Улуғбек туманида 28 ноябрь куни соат 16:10 ларда 5 та автомашина иштирокида ЙТҲ содир бўлди.
2025 йил 13 февраль куни Самарқандда содир бўлган ЙТҲ оқибатида икки киши жароҳатланди.
Аввалроқ Ўзбекистонда автомобилни такроран маст ҳолда бошқарганлик учун жиноий жавобгарлик белгиланаётгани ҳақида хабар берилганди.
Изоҳ (0)