Тошкентда 5 март куни бош вазир Абдулла Арипов ва Грузия бош вазири Иракли Кобахидзе бошчилигида икки мамлакат ҳукумат делегацияларининг учрашуви бўлиб ўтди. Бу ҳақда Ўзбекистон бош вазири матбуот хизмати хабар берди.
Сўнгги йилларда Ўзбекистон ва Грузия ўртасида ўзаро ишонч ва ҳурмат тамойилларига асосланган дўстона муносабатлар барча соҳаларда изчил ривожланиб бормоқда. Иқтисодиётнинг турли соҳаларида ҳамкорлик сезиларли даражада фаоллашяпти. Ўзаро савдо ҳажми ортиб, қўшма лойиҳалар амалга оширилмоқда. Маданий-гуманитар ҳамда ҳудудлараро алоқалар кенгаймоқда.
Ҳукуматлар олдида ана шу соҳаларда эришилган келишувларни ўз вақтида бажариш ҳамда икки томонлама алоқаларни ривожлантириш бўйича янги таклифлар ишлаб чиқиш асосий вазифа сифатида тургани таъкидланди.
Бунда асосий эътиборни уч йўналишга, яъни савдо-иқтисодий алоқаларни янада ривожлантириш, инвестиция ва кооперация лойиҳалари кўламини кенгайтириш, транспорт-логистика тизимини янада яхшилашга қаратиш лозимлиги қайд этилди.
Шундан келиб чиқиб, учрашувда товар айирбошлаш ҳажми ва унинг таркиби мамлакатларимиз салоҳиятига мос эмаслиги, Ўзбекистон-Грузия ўртасидаги Эркин савдо келишуви имкониятларини тўлиқ ишга солиб, яқин йилларда савдо ҳажмини 1 млрд долларга етказиш учун барча зарур шарт-шароитлар мавжудлигига эътибор қаратилди.
Бундай натижага тўқимачилик, пойабзал ва чарм, электротехника, озиқ-овқат маҳсулотлари, рангли ва қора металлар, мева-сабзавот, кимё маҳсулотлари, қурилиш материаллари ва бошқа товарлар олди-сотдисига кенг йўл очиш орқали эришиш мумкинлиги билдирилди.
Ҳукуматлар делегациялари учрашувида савдо-иқтисодий, инвестициявий йўналишлардан ташқари, қишлоқ хўжалиги, транспорт ва логистика, таълим, туризм, маданий-гуманитар соҳаларида ҳам ўзаро муносабатларни янада яхшилаш икки давлат манфаатларига бирдек мос келиши таъкидланди.
Шунингдек, ҳудудлараро ҳамкорлик ўзаро муносабатларнинг муҳим омили бўлиши мумкинлиги, шу маънода Самарқанд ва Батуми, Бухоро ва Мсхета шаҳарлари ўртасида тўғридан тўғри ҳамкорликнинг йўлга қўйилиши икки томонлама савдо-иқтисодий алоқалар ривожига салмоқли ҳисса қўшишига ишонч билдирилди.
Маълумот учун, куннинг биринчи ярмида Тошкент шаҳрида Ўзбекистон ва Грузия ўртасида иқтисодий ҳамкорлик бўйича Ҳукуматлараро комиссиянинг ўнинчи йиғилиши ўтказилиб, унинг доирасида Ҳукуматлараро комиссиянинг ўнинчи йиғилиши баёни, Давлат харидлари соҳасида ҳамкорлик тўғрисида англашув меморандуми, Қишлоқ хўжалиги соҳасида ҳамкорликни ривожлантириш бўйича “йўл харитаси” имзоланди.
Изоҳ (0)