“Йўл ҳаракати хавфсизлиги тизими такомиллаштирилиши муносабати билан Ўзбекистон Республикасининг Жиноят, Жиноят-процессуал кодексларига ҳамда Ўзбекистон Республикасининг Маъмурий жавобгарлик тўғрисидаги кодексига қўшимча ва ўзгартиришлар киритиш ҳақида”ги қонун 20 февраль куни қабул қилинди.
Жиноят кодексига киритилган қўшимчаларга кўра, транспорт воситасини мастлик ҳолатида бошқарганлик ёки текширувдан ўтишдан бўйин товлаганлик учун жиноий жавобгарлик белгиланди.
Шунингдек, қуйидагилар учун жиноий жавобгарлик жорий этилди:
- автомототранспорт воситаларининг ва улар тиркамаларининг (ярим тиркамаларининг) давлат рақам белгиларини ёки идентификация рақамларини қонунга хилоф равишда тайёрлаганлик, ўтказганлик ёки улардан фойдаланганлик, шунингдек, уларни қалбакилаштирганлик учун;
- автомототранспорт воситалари, шаҳар электр транспорти воситалари ҳайдовчиларини ва тракторчи-машинистларни тайёрлаш ҳамда қайта тайёрлаш, шунингдек, имтиҳонлар ўтказиш ва гувоҳномалар бериш тартибини бузганлик учун;
- транспорт воситаларини бошқариш ҳуқуқидан маҳрум этилган шахснинг транспорт воситасини бошқарганлик учун;
- сиқилган табиий газда, суюлтирилган нефть газида ёки дизель ва газсимон ёқилғи аралашмасида ишлайдиган транспорт воситаларидан фойдаланишда хавфсизлик қоидаларини бузганлик учун.
Қонун расмий эълон қилинган кундан эътиборан кучга кирди.
Мазкур қонун Қонунчилик палатасининг 2024 йил 28 ноябрдаги мажлисида уч ўқишда кўриб чиқиб, қабул қилинганди. Сенатнинг 24 январдаги мажлисида маъқулланганди. 2024 йил 16 августда ўтган 55-ялпи мажлисида ҳам кўрилган эди. Мажлисда сенатор Қутбиддин Бурхонов Ўзбекистонда 2024 йилда 9364 та йўл-транспорт ҳодисалари содир бўлганини, бунинг оқибатида 2203 киши вафот этган, 8901 нафари тан жароҳати олганини маълум қилганди.
Изоҳ (0)