2024-yil davomida yo‘l-qurilish sohasida jami 242 ta obyektda qariyb 17 milliard so‘mlik sifatsiz ishlar bajarilganligi aniqlandi. Bu haqda “Daryo”ga Transport nazorati inspeksiyasi matbuot xizmati ma’lum qildi.
Ta’kidlanishicha, Transport vazirligi huzuridagi Transport nazorati inspeksiyasi tomonidan yo‘l-qurilish ishlarini nazorat qilish yo‘nalishi bo‘yicha 2024-yil davomida jami 1785 ta yo‘l qurilish obyektlarida 2 625 ta nazorat ishlari o‘tkazilgan.
Nazorat qilish ishlari natijasida jami 7 mingdan (qurilish – 774 ta, rekonstruksiya – 1 182 ta, ta’mirlash – 4 476 ta, qazish – 577 ta) ortiq qoidabuzarliklar aniqlangan bo‘lib, ularni bartaraf etish bo‘yicha jami 2 418 ta buyurtmachi, pudratchi va qazish ishlarini bajaruvchilarga bajarilishi majburiy bo‘lgan ko‘rsatmalar berilgan.
Qonunchilik hujjatlari va texnik jihatdan tartibga solish sohasidagi normativ hujjatlar buzilishlariga yo‘l qo‘ygan tashkilotlarga bajarilishi majburiy bo‘lgan 351 ta taqdimnoma kiritilgan.
“Olib borilgan tizimli ishlar natijasida 242 ta obyektda aniqlangan 17 695 mln so‘mlik sifatsiz bajarilgan ishlarning hajmini to‘lovdan chiqarish bo‘yicha buyurtmachilarga talabnomalar kiritildi, ya’ni shuncha mablag‘ asosida bajarilgan sifatsiz ishlarni pudrat tashkilotlari o‘z hisoblaridan amalga oshirishdi.
“Bugungi kunda ijro etish muddati kelgan 236 ta obyektdagi 17 564 mln so‘mlik sifatsiz bajarilgan ishlar bartaraf etildi. Bajarish muddati kelmagan 6 ta obyektdagi 131 mln so‘mlik sifatsiz bajarilgan ishlarning ijrosi hududiy bo‘limlar inspektorlarining nazoratiga olingan”, deydi inspeksiya matbuot kotibi Firdavs Xayriddinov.
Qayd etilishicha, qonunchilik talablarini buzgan mansabdor shaxslarga nisbatan Ma’muriy javobgarlik to‘g‘risidagi Kodeksning 99 (shaharsozlik to‘g‘risidagi qonunchilikni buzish) va 147 (yo‘llarga, yo‘l inshootlariga, yo‘l harakatini tartibga solib turuvchi texnik vositalarga shikast yetkazish, ularni saqlash qoidalarini buzish, yo‘l harakatini tashkil etish talablarini bajarmaslik) moddalariga asosan jami 450 ta ma’muriy bayonnoma rasmiylashtirilib, sud organlariga yuborilgan.
Izoh (0)