Ўзбекистон ва Беларусь халқаро юк ташувчилари учун рухсатномалар бекор қилиниши мумкин, деб хабар бермоқда “Дунё” ахборот агентлиги.
Келтирилишича, Ўзбекистон элчиси Раҳматулла Назаров Беларусь транспорт ва коммуникациялар вазири Алексей Ляхнович билан учрашди. Музокараларда икки томонлама ҳамкорликнинг ҳозирги ҳолати ва уни янада ривожлантириш истиқболлари муҳокама қилинди.
Вазир Алексей Ляхнович Ўзбекистон ва Беларусь халқаро юк ташувчилари учун рухсатномаларни бекор қилиш масаласига эътибор қаратиб, ушбу қадам икки давлат ўртасидаги савдо айланмасининг ошишига туртки бўлишини билдирди.
Беларусь томони, шунингдек, халқаро автомобиль транспорти бўйича Беларусь—Ўзбекистон қўшма комиссиясининг навбатдаги мажлисини жорий йилнинг март—апрель ойларида Минск шаҳрида ташкил этишга тайёрлигини маълум қилди. Учрашувда халқаро транспорт йўлакларини ташкил этиш бўйича лойиҳалар, Термиз шаҳридаги халқаро транспорт-логистика хабидан фойдаланиш масалалари бўйича ҳам фикр алмашилди.
Шунингдек, Беларуснинг самарали жамоат транспорти тизими, аэропортлар учиш-қўниш йўлакларини лойиҳалаш, йўл белгиларини қўллаш бўйича тажрибасини Ўзбекистонда татбиқ этишга эътибор қаратилди.
Бундан аввал Александр Огородников Беларуснинг Ўзбекистондаги янги элчиси этиб тайинлангани ҳақида хабар берилганди.
Изоҳ (0)