Араб хурмоси асрлар давомида турли хасталикларга даво бўлиб, Яқин Шарқ ва Шимолий Африка мамлакатларида етиштирилади. Рамазон ойида бу ажойиб мева билан оғизни очиш одат бўлиб қолган.
Олимлар томонидан ўтказилган тадқиқотларга кўра, араб хурмоси яллиғланиш ва ўсимталарга қарши, антиоксидант таъсирга эга, аммо ушбу мевани нотўғри сақлаш ва ювмасдан истеъмол қилиш хурмони ҳақиқий заҳарга айлантириши мумкин.
Кўпинча ушбу қуритилган мевалар юзасида турли чанг, ифлосликлар ва ҳатто зарарли микроорганизмлар тўпланади. Айрим ишлаб чиқарувчилар хурмонинг ташқи кўринишини яхшилаш ва сақлаш муддатини узайтириш учун олтингугурт диоксиди ва бошқа кимёвий моддалар билан ишлов беришлари мумкин. Улар турли аллергик реакциялар ва овқат ҳазм қилиш тизимидаги муаммоларга олиб келиши мумкин.
Хурмонинг яна бир хавфи — тўғри сақлаш қоидаларига риоя этилмаслик натижасида пайдо бўлиши мумкин бўлган моғордир. Мева юзасида ҳосил бўлган бундай замбуруғлар жигар ва нерв тизимига салбий таъсир кўрсатадиган заҳарли моддаларни ўзидан чиқаради.
Шу сабабли мутахассислар араб хурмосини истеъмол қилишдан аввал уни илиқ сувда яхшилаб ювишни, шунингдек, моғорламаслиги учун меваларни қуруқ ва салқин жойда сақлашни тавсия қилади.
Изоҳ (0)