Arab xurmosi asrlar davomida turli xastaliklarga davo bo‘lib, Yaqin Sharq va Shimoliy Afrika mamlakatlarida yetishtiriladi. Ramazon oyida bu ajoyib meva bilan og‘izni ochish odat bo‘lib qolgan.
Olimlar tomonidan o‘tkazilgan tadqiqotlarga ko‘ra, arab xurmosi yallig‘lanish va o‘simtalarga qarshi, antioksidant ta’sirga ega, ammo ushbu mevani noto‘g‘ri saqlash va yuvmasdan iste’mol qilish xurmoni haqiqiy zaharga aylantirishi mumkin.
Ko‘pincha ushbu quritilgan mevalar yuzasida turli chang, iflosliklar va hatto zararli mikroorganizmlar to‘planadi. Ayrim ishlab chiqaruvchilar xurmoning tashqi ko‘rinishini yaxshilash va saqlash muddatini uzaytirish uchun oltingugurt dioksidi va boshqa kimyoviy moddalar bilan ishlov berishlari mumkin. Ular turli allergik reaksiyalar va ovqat hazm qilish tizimidagi muammolarga olib kelishi mumkin.
Xurmoning yana bir xavfi — to‘g‘ri saqlash qoidalariga rioya etilmaslik natijasida paydo bo‘lishi mumkin bo‘lgan mog‘ordir. Meva yuzasida hosil bo‘lgan bunday zamburug‘lar jigar va nerv tizimiga salbiy ta’sir ko‘rsatadigan zaharli moddalarni o‘zidan chiqaradi.
Shu sababli mutaxassislar arab xurmosini iste’mol qilishdan avval uni iliq suvda yaxshilab yuvishni, shuningdek, mog‘orlamasligi uchun mevalarni quruq va salqin joyda saqlashni tavsiya qiladi.
Izoh (0)