Европа Иттифоқи суди миллиардер Алишер Усмоновнинг санкциялар рўйхатидан олиб ташлаш ҳақидаги даъвосини рад этишга қарор қилди.
Маълум қилинишича, Евроиттифоқ суди “VEB” раҳбари ва Россия бош вазирининг собиқ ўринбосари Игор Шуваловга нисбатан санкцияларни ҳам бекор қилишдан бош тортган.
2022 йил февралида Россиянинг Украинага босқинидан сўнг Алишер Усмонов бошқа кўплаб россиялик тадбиркор ва сиёсатчилар сингари Европа Иттифоқи, АҚШ, Буюк Британия, Япония, Канада, Австралия ва бошқа давлатлар томонидан санкцияларга учради. Қарор Усмоновнинг Россия президенти Путин билан “яқин алоқалари” ва “Украинадаги беқарорликни фаол қўллаб-қувватлаши” билан асосланди.
Миллиардер Алишер Усмонов бу даъволарга қарши чиқди ва миллиард долларлик бойлиги туфайли рўйхатга киритилганини таъкидлади.
Алишер Усмонов Путиннинг “бизнес муаммоларини ҳал қилгани” судда оқланмаган
Январь ойида Гамбург ҳудудий суди Американинг Forbes журналига Алишер Усмонов Россия президенти Владимир Путинни “қўллаб-қувватлагани” ва “унинг бизнес муаммоларини ҳал қилгани” ҳақидаги баёнотларни тарқатишни тақиқлади.
Тегишли даъвога 2022 йил 2 февралда Forbes журналида чиққан “Украина туфайли Байден санкцияларига дучор бўлиши мумкин бўлган Путин олигархлари билан танишинг” сарлавҳали мақола сабаб бўлди. Шу сабабли 2023 йил 27 февралда мақола юзасидан даъво берилди.
Усмоновнинг ҳимоячиси мақолада асоссиз иддаолар, яъни аноним экспертнинг “Усмонов бир неча бор Путинни қўллаб-қувватлаган ва бизнесдаги муаммоларини ҳал қилган” деган иқтибосини ўз ичига олганини айтди.
Суд жараёнида Forbes баёнот берилган аноним манбани ошкор қилишдан бош тортди. Нашр, шунингдек, Усмонов қачон ва қандай қилиб Путинни “қўллаб-қувватлагани” ёки “бизнес муаммоларини ҳал қилгани” ҳақида мисол келтира олмаган.
Изоҳ (0)