Германия полицияси ва божхона ходимлари Мюнхен ва Тегернзее шаҳарларида Россиянинг Украинага босқини сабабли Европа санкциялари остига тушган россияликнинг бир қанча мулкларни тинтув қилди. Бу ҳақда Reuters ўз манбасига таяниб хабар берди.
Германия божхона органлари томонидан санкциялар бўйича тузилган “Матрёшка” махсус комиссияси тинтувлар суд қарори асосида ўтказилганини маълум қилди. Германия расмийлари россияликнинг исмини ошкор қилмади.
Reuters манбасига кўра, гап миллиардер Алишер Усмонов ҳақида кетмоқда. Германиянинг Билд нашри полиция Усмоновнинг Бавариядаги Роттах-Эгерн шаҳрида, Тегернзее кўли қирғоғидаги вилласига рейд уюштирганини даъво қилмоқда. Уйдан қимматбаҳо буюмлар, жумладан, Mercedes Maybach S500 каби ҳашаматли автомобиллар олиб кетилган.
“Германия ҳуқуқ-тартибот идораларининг Алишер Усмоновга нисбатан хатти-ҳаракатлари катта ҳайрат ва шармандалик ҳиссини уйғотади”, — дейилади тадбиркорнинг матбуот хизмати хабарида. Усмоновнинг вакиллари тинтувлар миллиардерга тегишли объектларда ўтказилганини инкор этмоқда. Усмонов ўзи қачондир асос солган траст активлари устидан назорат қилиш ҳуқуқига эга эмас ва “трастга тегишли мол-мулкка ҳозир нима бўлаётганини била олмайди”, деди матбуот хизмати.
“Ўтказилган тинтув қўрқитиш ва сиёсий таъқибнинг навбатдаги эпизодига ўхшайди”, — деб қўшимча қилди Усмонов матбуот хизмати. Шунингдек, улар немис божхона махсус комиссиясининг “Матрёшка” деб номланишида тадбиркорнинг “миллатига ишора” борлигини кўришган.
2022 йил сентябр ойида Германия ҳуқуқ-тартибот идоралари Алишер Усмоновга алоқадор 24 та объектда тинтув ўтказган. Хусусан, улар Тегернзее бўйидаги виллада ва “Дилбар” яхтасида ўтказилган. Тинтувлар давомида терговчилар умумий қиймати беш миллион еврога тенг ҳужжатлар ва 30 та картинани мусодара қилишди. Кейинроқ Германия суди тинтувларни ноқонуний деб топди, Усмонов эса “Дилбар” яхтасида олиб борилган тергов ҳаракатлари туфайли судга мурожаат қилди.
Изоҳ (0)