Россиялик тадбиркор Алишер Усмонов Халқаро қиличбозлик федерацияси (FIE) президенти этиб сайланди.
Шу муносабат билан Усмонов 2024 йил 30 ноябрь куни Тошкентдаги конгрессда сайлов якунлари бўйича ОАВ учун баёнот берди.
“Дарё” мухбирининг қайд этишича, Усмонов Халқаро қиличбозлик оиласининг ишончи ва қўллаб-қувватлаши учун миннатдорлик билдирган.
“Менинг номзодимни қўллаб-қувватлаган 103 та миллий федерациянинг фикрини эътиборсиз қолдира олмадим ва номзодимни ёқлаб овоз берган ҳар бир федерацияга миннатдорчилик билдираман.
Барчангизни қиличбозликнинг ёрқин келажаги ва унинг жадал ривожланишига ишонтирмоқчиман. Яқин ўтмишда севимли спортимизни қоралашлар, унга нисбатан туҳматлар, шунингдек, қиличбозликни мутлақо спортга хос бўлмаган кураш турлари майдонига айлантиришга уринишларига қарамай, бунинг учун қўлимдан келган барча ишни қиламан.
Маълумки, менга нисбатан асоссиз чекловлар қўлланилмоқда, ва мен ҳозирда бу чекловларга қарши судда эътироз билдирмоқдаман. Шу муносабат билан, мен ҳар доим FIE манфаатларини кўзлаб иш юритганимни ва бундан кейин ҳам менга нисбатан қўлланилган ҳуқуқий жиҳатдан асоссиз санкцияларнинг FIE ва унинг фаолиятига таъсир кўрсатишига йўл қўймаслик учун барча зарур чораларни кўришимни таъкидламоқчиман.
Ишончим комилки, севимли спортимизнинг олдида янги юксалиш даври ва ёрқин ғалабалар турибди. Қиличбозлик энг машҳур олимпиада спорт турлари қаторидан мустаҳкам ўрин олишга муносиб эканлигига ва бунга яқин йиллар ичида эришиш мумкинлигига аминман!”, дейди Усмонов.
Тошкентда FIE президентлиги учун бўлиб ўтган сайловда Усмоновнинг рақиби Швеция қиличбозлик федерацияси президенти Отто Дракенберг бўлди. Усмонов 120 та, Дракенберг 26 та овозни қўлга киритди.
71 ёшли Усмонов номзодининг ушбу лавозимга илгари сурилиши ҳақида октябрь ойи охирида маълум бўлган эди. Уни 100 дан ортиқ мамлакат қиличбозлик федерациялари қўллаб-қувватлади.
Усмонов FIE’ни 2008 йилдан буён бошқариб келади. 2021 йил ноябрь ойида у сайловда ягона номзод бўлиб, янги муддатга федерация президенти этиб қайта сайланган эди. 2022 йилнинг март ойида Усмонов Европа иттифоқи томонидан унга қарши жорий қилинган санкциялар туфайли ўз ваколатларини тўхтатди.
2023 йил март ойида FIE россиялик спортчиларга нейтрал мақомда мусобақалашишга рухсат беришга қарор қилди.
Изоҳ (0)