Санкцияларга қарамай Алишер Усмоновнинг 4 млн долларлик яхтаси Россияга олиб келинди

USM холдинг асосчиси, миллиардер Алишер Усмоновнинг қарийб 4 миллион долларлик “Зоe” яхтаси Россияга қариндошлари учун олиб кетилган, деб Тhе Insider хабар берди.

Маълум бўлишича, Британияда ишлаб чиқарилган Sunseeker Predator кемаси Туркия орқали Сочига етиб келган. Божхона ҳужжатларидан маълум бўлишича, бу февраль ойининг охирида содир бўлган.

Яхтани олувчи Аves Trade компанияси бўлган. Унинг асосчиси Олег Гарай. У, шунингдек, Усмоновнинг ўгай ўғли Антон (Натан) Винерга тегишли “Градпроект” ва “Родина Строй Груп” компанияларининг бош директори бўлиб ишлайди.

Кема Усмоновнинг собиқ рафиқаси Ирина Винер учун олиб келинган, — дейилади хабарда.

“Зоe”нинг характеристикалари ва ишлаб чиқарилган йили Усмоновга қарши санкциялар туфайли ҳибсга олинган ҳамда Хорватия портидан ўғирланган Ирина ВУ яхтаси ҳақидаги маълумотларга тўғри келган. 

Усмонов АҚШ, Европа Иттифоқи, Буюк Британия, Швейцария, Канада, Япония, Австралия ва Янги Зеландиянинг қора рўйхатига киритилган. Миллиардерга нисбатан чекловлар Россия-Украина уруши бошланганидан сўнг киритилган. Европа санкциялари доирасида Германия расмийлари унинг синглиси Гулбаҳор Исмоилованинг тахминан 600 миллион долларлик “Дилбар” яхтасини мусодара қилган эди.

• Алишер Усмонов 13,4 миллиард доллар бойлиги билан Россиянинг энг бадавлат кишилари ўнталигига киради.