Швейцарияда россиялик миллиардер Алишер Усмонов асос солган трастларга тегишли 6,5 миллион евродан ортиқ активлар блокдан чиқарилди. Бу ҳақда Tages-Anzeiger газетаси хабар берди.
Швейцария Иқтисодий масалалар бўйича давлат котибияти (SECО) трастлар Усмоновнинг ўзи ёки унинг синглиси томонидан “тўғридан тўғри ёки билвосита” назорат қилинишини таъкидлаган. Credit Suisse банкидаги ҳисобварақларда музлатилган маблағлар Франциядаги иккита вертолётга ва Лондондаги 50 миллион долларлик ҳашаматли уйга хизмат кўрсатиш тўловларини амалга ошириш учун блокдан чиқарилган.
Санкцияга учраган мултимиллиардер Алишер Усмонов Credit Suisse’нинг блокланган ҳисобварақларидан олти миллион евродан ортиқ маблағни ишлата олди, дейилади хабарда.
Лондон яқинидаги Суррей шаҳрида жойлашган шаҳар ташқарисидаги қароргоҳда таъмирлаш ишлари учун тўловлар бўйича қарздорликлар қайд этилган.
Швейцариянинг Иқтисодий масалалар бўйича давлат котибияти (SECО) алоҳида ҳолларда активларни блокдан чиқаришга рухсат бериши мумкин. Масалан, бу санкциялар остидаги шахслар оғир молиявий аҳволда эканини ёки эски шартномалар бўйича мажбуриятларни бажариш зарурлигини исботласа, амалга оширилиши мумкин.
Credit Suisse’даги маблағларни блокдан чиқариш бўйича SECO’га аризалар 2022 йилда Усмонов ёки унинг синглиси билан боғлиқ бир нечта фирмалар манфаатларини ифодаловчи Женева траст компанияси томонидан берилган.
SECО маблағларни блокдан чиқариш тўғрисидаги қарорни шартномалар санкциялар киритилишидан олдин тузилгани ва ҳисобварақларни тўламаслик активлар қийматининг йўқолишига олиб келиши мумкинлиги билан изоҳлади.
12 миллион ва 15 миллион Швейцария франки (13 миллион ва 16 миллион доллар) қийматидаги вертолётлар Франциянинг жанубидаги Ле-Кастел аэродромида жойлашган. Женева трастлари маълум қилишича, авиатехника ва ангарни сақлаш бўйича тузилган шартномалар асосида бир нечта тўлов ҳисоб-китоблари тақдим этилган.
Бундан ташқари, маҳаллий компания аллақачон вертолётлардан бирини мусодара қилиш бўйича суд жараёнини бошлаган. Тўловларни амалга ошириш учун SECО қарийб 2,5 миллион еврони блокдан чиқарган. Шунингдек, вертолётларга хизмат кўрсатиш учун ойига тахминан 54 минг евро миқдоридаги тўловлар ҳам тасдиқланган.
Буюк Британиядаги қасрга хизмат кўрсатиш учун тўловларни амалга ошириш мақсадида Швейцария идораси тахминан 4,2 миллион еврони блокдан чиқарди. Женевадаги ишончли бошқарувчилар таъкидлашича, бир нечта қурилиш компаниялари яқин вақт ичида тўловларни олмаса, улар банкротлик хавфи остида қолиши мумкин.
Усмоновнинг адвокати блокдан чиқарилган пуллар миллиардер ёки унинг синглисига эмас, балки Усмонов “кўп йиллар олдин” таъсис этган трастларга тегишли эканини даъво қилмоқда.
Изоҳ (0)