Мадриднинг “Реал” клуби ярим ҳимоячиси Лука Модрич жорий мавсум тугагандан сўнг ҳам жамоада ўйнашни давом эттириш ниятида.
Relevo нашрининг хабарига кўра, хорватиялик футболчи “қаймоқранглилар” билан шартномасини яна бир йилга узайтиришни истайди. Таъкидланишича, 39 ёшли футболчи “қироллик” клуби раҳбариятидан таклиф кутмоқда. Модричнинг “Реал” билан амалдаги шартномаси 2025 йилнинг ёзига қадар мўлжалланган.
Модрич 2012 йилдан буён “Реал” сафида тўп сурмоқда. Шу вақт ичида у барча турнирларда жами 574 та ўйинда майдонга тушиб, 42 та гол урган ва 92 та голли узатма берган.
Ла Лиганинг 25-турида “Реал” ўз майдонида “Жирона”ни қабул қилди ва 2:0 ҳисобида ғалаба қозонди. Мадридликлар сафида биринчи голни Модрич 41-дақиқада киритди. Ушбу ғалабадан сўнг “Реал” очколари сонини 54 тага етказиб “Барселона” билан етакчиликни сақлаб турибди.
Изоҳ (0)