Маdridning “Real” klubi yarim himoyachisi Luka Modrich joriy mavsum tugagandan so‘ng ham jamoada o‘ynashni davom ettirish niyatida.

Relevo nashrining xabariga ko‘ra, xorvatiyalik futbolchi “qaymoqranglilar” bilan shartnomasini yana bir yilga uzaytirishni istaydi. Ta’kidlanishicha, 39 yoshli futbolchi “qirollik” klubi rahbariyatidan taklif kutmoqda. Modrichning “Real” bilan amaldagi shartnomasi 2025-yilning yoziga qadar mo‘ljallangan.
Modrich 2012-yildan buyon “Real” safida to‘p surmoqda. Shu vaqt ichida u barcha turnirlarda jami 574 ta o‘yinda maydonga tushib, 42 ta gol urgan va 92 ta golli uzatma bergan.
La Liganing 25-turida “Real” o‘z maydonida “Jirona”ni qabul qildi va 2:0 hisobida g‘alaba qozondi. Madridliklar safida birinchi golni Modrich 41-daqiqada kiritdi. Ushbu g‘alabadan so‘ng “Real” ochkolari sonini 54 taga yetkazib “Barselona” bilan yetakchilikni saqlab turibdi.
Izoh (0)