Остона афғон аёллари ва қизларини ўқитиш бўйича таълим дастурини давом эттиришга тайёр. Бу ҳақда Қозоғистон Ташқи ишлар вазирлиги матбуот котиби Айбек Смадияров брифингда маълум қилди.
“Афғонистон ҳукумати ва ушбу дастурни молиялаштирган Европа Иттифоқи билан келишувга эришилди. Яқин кунларда дастур қайта йўлга қўйилади”, — деди Смадияров. Ушбу ўқув дастури доирасида афғон аёллари учун қанча грант ажратилганига аниқлик киритилмаган.
19—20 январь кунлари Брюсселда Марказий Осиё давлатлари ва Европа Иттифоқининг Афғонистон бўйича махсус вакиллари учрашуви бўлиб ўтди. Унда иштирокчилар Афғонистонда мустаҳкам тинчлик ва барқарор тараққиётни ҳар томонлама қўллаб-қувватлаш мақсадини тасдиқлаб, афғон аёл-қизлари ҳуқуқларининг ёмонлашувидан хавотир билдирган.
Қозоғистон Ташқи ишлар вазирлигининг махсус топшириқлар бўйича элчиси Талгат Калиев Қозоғистон афғон халқига ёрдам бериш бўйича ўз мажбуриятларига содиқлигини таъкидлаган ва Қозоғистон университетлари афғон талабалари учун таълим дастурида фаол иштирок этишда давом этишини билдирган.
Декабрь ойида “Толибон” етакчилигидаги Афғонистон ҳукумати давлат ва хусусий университетларда талаба қизларнинг ўқишини номаълум муддатга тўхтатиб қўйганди. Ҳокимиятга келганидан сўнг “Толибон” аёллар ҳуқуқларини ҳурмат қилишга ваъда берган, бироқ тез орада чекловлар жорий қила бошлаган.
Маълумот учун, 2019 йилда Европа Иттифоқи БМТ Тараққиёт дастури билан қўшма синов лойиҳаси доирасида афғон қизларини Ўзбекистон ва Қозоғистон университетларида ўқитиш ҳамда Қирғизистон, Тожикистон ва Туркманистондаги махсус таълим дастурлари учун 2 миллион евро ажратган. “Толибон” ҳукуматга келганидан сўнг, бу ташаббус тўхтаб қолган.
Изоҳ (0)