БМТ Қочқинлар бўйича агентлиги, БМТ Қочқинлар бўйича Олий комиссарлиги 8 февраль куни Ўзбекистон ҳукумати кўмагида Термиз шаҳридаги халқаро кўп функцияли транспорт-логистика хаби орқали Афғонистонга навбатдаги беғараз ёрдамини жўнатди, деб хабар бермоқда ЎзА.
Қайд этилишича, ушбу транспорт-логистика хабидан беғараз ёрдам юки ортилган автомашиналар карвони “Айритом” чегара ўтказиш пункти орқали қўшни мамлакатнинг Мозори Шариф шаҳрига жўнаб кетди.
БМТ Қочқинлар бўйича Олий комиссарлиги мутасаддиларининг таъкидлашича, Ўзбекистон кўмагида қўшни мамлакатга 12 та юк машинасига юкланган 48 мингдан ортиқ кўрпа (адёл) қаҳратон совуқда ҳимояга муҳтож афғон халқининг ҳаётини сақлаб қолишда муҳим ўрин тутади.
“Биз Ўзбекистон ҳукумати билан жафокаш афғон халқига ҳаётий инсонпарварлик ёрдами кўрсатишни давом эттириш учун барча саъй–ҳаракатларни амалга оширмоқдамиз. Ҳамкорликдаги ишимиз бу йилги совуқ қишда ҳам жуда муҳим аҳамият касб этаётир. Чунки, бу сафарги инсонпарварлик ёрдами Афғонистондаги кўплаб ҳимояга муҳтож инсонларнинг кўрпага (адёл) бўлган эҳтиёжини қондиради”, — деган БМТ Қочқинлар бўйича Олий комиссарлиги катта маслаҳатчиси Фрэнк Ремус.
Изоҳ (0)