Шавкат Мирзиёевнинг Кувайтга расмий ташрифи арафасида 15 февраль куни ушбу мамлакат пойтахтида Ўзбекистон—Кувайт бизнес-форуми бўлиб ўтди, деб хабар бермоқда “Дарё” мухбири.
Тадбирда икки давлатнинг тегишли вазирлик ва идоралари, тармоқ бирлашмалари раҳбарлари ҳамда 100 дан кўпроқ йирик компания ва молия институтлари раҳбарлари иштирок этди. Форумда делегацияларга Ўзбекистон томонидан — Ўзбекистон инвестициялар, саноат ва савдо вазири Лазиз Қудратов, Кувайт томонидан — Кувайт Савдо-саноат палатаси раҳбари Рабаҳ ал-Рабаҳ бошчилик қилди.
Форумнинг очилиш маросимида қутлов сўзи билан сўзга чиққан Лазиз Қудратов сўнгги йилларда Ўзбекистон билан Кувайт ўртасидаги муносабатлар ривожланиб бораётганини алоҳида таъкидлади. Ўзбекистонда соғлиқни сақлаш, қишлоқ хўжалиги, инфратузилма, меҳмонхона бизнеси, фармацевтика ва кўчмас мулк соҳаларида лойиҳаларни муваффақиятли амалга ошираётган йирик компаниялар қаторида Gulf Care, Аl Tijaria, Аl Imtiaz, Fouad Al Ghanim, Agility ва бошқалар бор.
Ўзбекистонда хорижий инвесторлар учун энг қулай шароитлар яратилгани таъкидланди. Хусусан,имтиёзлар ва преференциялар жорий этилди, тадбиркорлар дуч келаётган тўсиқлар олиб ташланмоқда, хусусийлаштириш дастури амалга оширилмоқда, инфратузилмаси ривожланган ўнлаб ЭИЗлар ташкил қилинди, МДҲ ва Европа Иттифоқи бозорларига божсиз кириш таъминланди. Натижада сўнгги йилларда Ўзбекистон иқтисодиёти қарийб икки баравар ошди. Биргина 2024 йилда ЯИМ 6,5 фоизга ўсиб, 115 миллиард долларга етди. Хорижий инвестициялар ҳажми 1,6 баробар кўпайиб, 34,9 миллиард долларни ташкил этди.
Шу билан бирга, икки давлат ўртасидаги савдо-иқтисодий, сармоявий ва саноат соҳасидаги ҳамкорликни чуқурлаштириш бўйича фойдаланилмаётган улкан салоҳиятга эътибор қаратилди.
Шу ўринда, агросаноат тармоғи, тўқимачилик саноати, тоғ-кон саноати, энергетика ва нефть-кимё, соғлиқни сақлаш ва фармацевтика, хусусийлаштириш, логистика, алоқа ва туризм каби ҳамкорликни янада ривожлантиришнинг устувор йўналишлари санаб ўтилди.
Ўз навбатида, Кувайт Савдо-саноат палатаси раҳбари Рабаҳ ал-Рабаҳ Ўзбекистоннинг икки томонлама савдо-иқтисодий ва сармоявий ҳамкорликни ривожлантириш учун шарт-шароитлар яратиш борасидаги саъй-ҳаракатларини юқори баҳолади ҳамда Кувайт ва Ўзбекистон тадбиркорларини ҳамкорликни чуқурлаштиришга чақирди, уларни томонларнинг янги лойиҳалар ва ташаббусларни қўллаб-қувватлашга ўзаро тайёр эканига ишонтирди.
Бизнес-форум доирасида “B2B” ва “G2B” музокаралари ташкил этилди. Тадбиркорлар янги алоқаларни ўрнатиш, қўшма лойиҳаларнинг муҳимжиҳатлари ва товарларни ўзаро етказиб бериш масалаларини муҳокама қилиш имконига эга бўлди.
Шунингдек, форум доирасида Ўзбекистон миллий маҳсулотлари кўргазмаси ташкил этилиб, унда тадбиркорлар ташқи бозорда талаб юқори бўлган маҳсулотларни намойиш этди.
Тадбир якунлари бўйича қатор инвестициявий битимлар ва савдо шартномалари имзоланди. Бизнес доиралари вакилларига кўра, имзоланган ҳужжатлар қисқа вақт ичида Ўзбекистон—Кувайт алоқаларини сезиларли даражада кенгайтириш ва икки давлат ўртасидаги товар айирбошлаш ҳажмини ошириш имконини беради.
Ўзбекистон президентининг Кувайтга ташрифи
Шавкат Мирзиёев Кувайт амири Мишъал ас-Сабоҳнинг таклифига биноан 17—18 февраль кунлари расмий ташриф билан ушбу мамлакатда бўлади. Ал-Кувайт шаҳрида олий даражада икки томонлама музокаралар ҳамда ушбу мамлакат ҳукумати аъзолари, етакчи компаниялари ва банк-молия тузилмалари раҳбарлари билан учрашувлар бўлиб ўтади.
Ўзбекистон—Кувайт муносабатлари
Кувайт Ўзбекисён мустақиллигини 1991 йил 30-декабарда тан олган. Икки давлат ўртасида дипломатик муносабатлар 1994 йил июлда ўрнатилган. Кувайт элчихонаси Тошкентда 2001 йилда, Ўзбекистоннинг Ал-Кувайтдаги элчихонаси эса 2004 йилда очилган.
Икки мамлакат халқаро ташкилотлар ва молиявий институтлар, жумладан, БМТ ва ИҲТ доирасида яқиндан ҳамкорлик қилмоқда. Икки давлар Ташқи ишлар вазирликлари ўртасида сиёсий маслаҳатлашувларнинг иккита давраси ўтказилган.
2004 йил 19 январда имзоланган савдо, иқтисодий, илмий ва техник ҳамкорликка оид битимга асосан савдо-иқтисодий ҳамкорлик бўйича қўшма ҳукуматлараро комиссияси тузилган. Унинг ҳамраислари этиб икки давлат молия вазирлари тайинланган.
2024 йил 16—21 октябрь кунлари Тошкент шаҳри, Фарғона ва Сирдарё вилоятларида Ўзбекистон—Кувайт бизнес-форумлари ўтказилганди. Ўша йилнинг май ва август ойларида Кувайтда бизнес форумлар ва Made in Uzbekistan кўргазмалари ўтказилди.
Изоҳ (0)