12—14 октябрь кунлари БМТнинг Ўзбекистондаги доимий вакили Ҳелена Фрейзер ва Швейцариянинг Ўзбекистондаги элчиси Оливье Шав ҳудуднинг ҳозирги аҳволи, ҳукуматнинг экологик инқироз оқибатларини бартараф этиш боʻйича олиб бораётган саъй-ҳаракатлари, иқлим ўзгаришига мослашиш бўйича кўрилаётган чора-тадбирлар ҳамда БМТнинг мамлакатнинг шимолий ҳудудидаги фаолияти билан танишиш мақсадида Қорақалпоғистон Республикасига ташриф буюрди. Бу ҳақда БМТнинг Ўзбекистондаги ваколатхонаси матбуот хизмати хабар бермоқда.
Сафар БМТнинг инсон хавфсизлиги бўйича Мақсадли фондининг молиявий кўмаги орқали молиялаштирилаётган «Орол минтақаси учун инсон хавфсизлиги бўйича кўпшериклик фондини ташкил қилиш орқали Орол фожиасидан зарар кўрган аҳолининг турмуш шароити салоҳиятини мустаҳкамлаш» қўшма дастури томонидан ташкил этилди.
13 октябрь куни Қорақалпоғистон Республикаси Жўқорғи Кенгеси ва Вазирлар Кенгашида қатор расмий учрашувлар ўтказилиб, улар ҳудуднинг шу кундаги аҳволи, ҳамкорлик натижалари ва истиқболлари ҳақида умумий тасаввур олиш, ҳамда Оролбўйи ҳудудида истиқомат қилувчи ҳамжамиятларга кўмак бериш бўйича шерикликнинг устувор йўналишларини белгилаб олиш имконини берди.
«Орол денгизи фожиаси натижасида азият чеккан одамларга ёрдам кўрсатиш учун барча ҳамкорларнинг, ҳам ҳукумат, ҳам халқаро ҳамжамиятнинг мувофиқлаштирилган саъй-ҳаракатлари зарур эканлигини барчамиз тушунамиз. Шу муносабат билан Қорақалпоғистонда амалга оширилаётган БМТнинг қўшма дастури Орол денгизи ҳудуди учун давлат дастурида белгиланган устуворликларни акс эттираётгани ва тўлдираётгани муҳимдир», — дея таъкидлади Ҳелена Фрейзер.
Делегация, шунингдек, БМТнинг қўшма дастури ва иқлим ўзгариши ҳақидаги БМТнинг доиравий конвенцияси Адаптация фондининг молиявий кўмагида БМТ Тараққиёт дастури томонидан Нукус ва Мўйноқда амалга оширилган баъзи намунавий объектларга ҳам ташриф буюрди.
Шу жумладан, Тошкент давлат аграр университетининг Нукус филиали ҳузуридаги асосий вазифаси хўжаликлари Қорақалпоғистоннинг қурғоқчил туманларида жойлашган фермер ва деҳқонларга ахборот кўмагини кўрсатиш бўлган маслаҳат–ахборот марказида, қишлоқ хўжалиги ишлаб чиқариши, авиаташувлар ва ер усти транспорти соҳасида кенг қўлланиладиган аниқ маълумотларни тўхтовсиз тақдим этувчи автоматлаштирилган метеорологик станцияда ҳам бўлди. Даромад манбаларини шакллантиришга йўналтирилган объектлар ҳам ташриф дастуридан ўрин олди – булар Ўзбекистон бадиий академиясининг Қорақалпоғистон бўлими кўмагида ишга туширилган ҳунармандчиликни ривожлантириш бўйича марказ ва Қорақалпоғистон ногиронлар жамияти билан ҳамкорликда очилган тикув цехи.
Мўйноқда Ҳелена Фрейзер ва Оливье Шав тикув ва сувенир маҳсулотларини ишлаб чиқариш бўйича цехларга, компьютер хизматларини кўрсатиш маркази ва маҳаллий аҳолига тўлақонли ва юқори сифатли тиббий кўмак кўрсатиш имконини берувчи қуёш панеллари ўрнатилган «Орол» қишлоқ врачлик пунктига ҳам ташриф буюрди.
Изоҳ (0)