2016 йилнинг 16—21-октябр кунлари Оʻзбекистон Республикаси вакиллари электрон давлат хизматлари коʻрсатиш тартибини такомиллаштириш соҳасида Латвия тажрибасини оʻрганиш учун Латвия Республикасига ўқув-таништириш ташрифини амалга оширди. Бу ҳақда Ўзбекистондаги БМТ Тараққиёт дастури матбуот хизмати хабар берди. Ташриф ташкилотчилари: БМТТДнинг «Электрон ҳукуматни ривожлантириш орқали давлат хизматлари сифатини ошириш» лойиҳаси ва Латвия Ташқи ишлар вазирлиги.
Ўзбекистон делегацияси Ахборот технологиялари ва коммуникацияларини ривожлантириш вазирлиги, Молия вазирлиги, Ички ишлар вазирлиги, Савдо-саноат палатаси, Тошкент шаҳар ҳокимияти ҳамда БМТТД лойиҳаси мутахассисларидан иборат эди.
Ташрифнинг асосий мақсади Латвия давлат органлари билан электрон хизматларни ривожлантиришга оид тажриба алмашиш, жумладан, давлат органларининг ички жараёнлари фаолияти (back office), давлат хизматларини кўрсатиш тартиб-таомиллари реинжиниринги бўйича илғор тажрибасини ўрганиш, шунингдек электрон давлат хизматларини кўрсатиш билан боғлиқ бошқа масалаларни ўрганишдан иборат бўлди.
Ташриф давомида ўзбекистонлик вакиллар Латвиянинг ушбу соҳадаги асосий давлат идоралари, жумладан, Атроф-муҳитни ҳимоялаш ва ҳудудларни ривожлантириш вазирлиги, Молия вазирлиги, Фан ва таълим вазирлиги, Адлия вазирлиги, Фуқаролик ва миграция масалалари бўйича департамент, Даромадлар бўйича давлат хизмати, Рига шаҳри Ахборот технологиялари намойиши маркази билан танишиб, Латвия электрон ҳукумати архитектураси ҳамда электрон давлат хизматларини тақдим этиш амалиёти билан танишиш имкониятига эга бўлди.
Шунингдек, иштирокчиларга Латвия электрон ҳукуматининг стратегияси намойиш этилиб, хизматларни электрон шаклга ўтказиш билан боғлиқ муаммолар, уларни ҳал этишга оид чора-тадбирлар ва олинган сабоқлар муҳокама қилинди.
Ноябрь ойида Тошкентда ўқув сафарига бағишланган семинар ташкил этилиб, у ерда сафар иштирокчилари электрон хизматларни ривожлантириш бўйича Латвия тажрибаси ҳақида олган билимларини бошқа давлат идоралари ва ОАВ вакиллари учун тақдим этади.
Изоҳ (0)