15 ноябрь куни Тошкент шаҳридаги International Hotel Tashkent меҳмонхонасида Қорақалпоғистон Республикасида ўтказилган ижтимоий-иқтисодий ва экологик тадқиқотнинг асосий натижалари тақдимоти ўтказилди ҳамда Бирлашган Миллатлар Ташкилоти (БМТ) доирасида Оролбўйи минтақаси учун инсон хавфсизлиги бўйича кўпшериклик фондини ташкил этиш юзасидан таклифлар муҳокама этилди. Бу ҳақда БМТнинг Ўзбекистондаги ваколатхонаси ахборот хизмати хабар бермоқда.
Тадбир БМТнинг Ўзбекистондаги ваколатхонаси ҳамда Ўзбекистон Республикаси Иқтисодиёт вазирлиги томонидан Орол денгизи инқирози оқибатларидан зарар кўрган аҳолининг турмуш шароити салоҳиятини мустаҳкамлаш бўйича БМТнинг қўшма дастури доирасида ташкил этилди. Тадбирда алоқадор вазирлик ва идоралар, дипломатик миссиялар, халқаро ташкилотлар ва молия институтлари вакиллари иштирок этди.
Жорий йилнинг август ойида Қорақалпоғистон Республикасининг Орол денгизи инқирози оқибатида энг кўп зарар кўрган 8 та туманида тадқиқот ўтказилиб, у мазкур туманлардаги мавжуд барча 116 маҳалладаги 1600 уй хўжаликлари қамраб олинди.
Шунингдек, ҳар бир туманда, тегишли вазирлик ва идоралар, корхона ва ташкилотлар вакиллари, фермерлар, фуқароларнинг ўзини-ўзи бошқариш органлари ва фуқаролик жамияти вакиллари иштирокида суҳбатлар ва муҳокамалар ташкил этилди.
Ижтимоий тадқиқот ижтимоий инфратузилмалар ҳолатини, ижтимоий аҳамиятга эга асосий хизмат турларининг мавжудлиги ва сифат даражасини баҳолаш орқали уй хўжаликларининг фаровонлиги тўғрисида тўлиқ маълумот олиш имконини берди.
Мазкур тадқиқот натижалари ўрганилган ҳудудларни ижтимоий-иқтисодий ривожлантириш бўйича қўшимча чора-тадбирларни ишлаб чиқишда амалий аҳамиятга эга бўлиб, шунингдек, БМТ ҳомийлигида Оролбўйи минтақаси учун инсон хавфсизлиги бўйича кўпшериклик фондини ташкил этиш учун дастур стратегиясини ишлаб чиқиш учун асос бўлиб хизмат қилади. Фонднинг фаолияти, биринчи навбатда, лойиҳалар фаолиятини мувофиқлаштиришнинг самарали механизмини ишлаб чиқиш, шунингдек, 2017—2021 йилларда Оролбўйи минтақасини ривожлантириш давлат дастурини амалга оширишга кўмаклашиш доирасида халқаро ҳамкор ташкилотларнинг молиявий ресурсларини кенг жалб этишга қаратилади.
Изоҳ (0)