ҲАМАС Исроилни ўт очишни тўхтатиш тўғрисидаги келишувни бузганликда, жумладан, Ғазодаги фаластинликларга ҳаво ҳужумлари уюштирганликда айблади ва гаровга олинганларни озод қилиш келаси шанба кунига қолдирилишини айтди.
Сўнгги уч ҳафта давомида биз душман томонидан келишув шартларининг доимий равишда бузилишини кузатдик, деб ёзди ҲАМАСнинг ҳарбий қаноти ҳисобланмиш “Иззаддин ал-Қассам бригадалари” гуруҳи вакили Абу Убайда ўзининг Telegram каналида.
Унинг қайд этишича, шу муносабат билан ҲАМАС 15 февраль куни озод қилиниши кутилаётган асирларни Исроилга қайтаришни кейинги огоҳлантиришгача кечиктиришга қарор қилган.
У Исроил келишув қоидаларига риоя қилиши ва сўнгги ҳафталарда етказилган зарарни қоплаши кераклигини қўшимча қилди. Кейинги алмашинув шанба кунига белгиланган бўлиб, унда юзлаб фаластинлик маҳбуслар эвазига уч нафар исроиллик гаровга олинганларни озод қилиш режалаштирилган эди.
Исроилни келишувни мунтазам равишда бузишда айблаган Абу Убайданинг таъкидлашича, айбловлар “кўчирилган фаластинликларга Ғазо шимолига қайтишга рухсат беришни кечиктириш, ҳаво ҳужумлари ва секторнинг турли ҳудудларини ўққа тутиш, шунингдек, келишувларга мувофиқ гуманитар ёрдам етказиб беришга кўмаклашишга қодир эмасликни ўз ичига олади”.
ҲАМАС бир оз аввал Исроил билан ўт очишни тўхтатиш ҳамда асирларни алмашиш бўйича келишув хавф остида эканини айтиб, у барбод бўлиши мумкинлиги ҳақида огоҳлантирган эди. Шунингдек, ҳаракат вакили Қатарда келишувнинг иккинчи босқичи тафсилотларини муҳокама қилиш учун Исроил билан билвосита музокаралар ўтказишга ҳамон тайёр эканлигини таъкидлаган.
Исроил ва ҲАМАС ўртасида ўт очишни тўхтатиш келишуви ва асирлар алмашинуви
ҲАМАС ва Исроил ўртасида ўт очишни тўхтатиш ва асирларни алмашиш бўйича келишув 19 январь куни кучга кирди.
Асирлар алмашинувининг дастлабки тўрт босқичида Исроил қамоқхоналаридан 583 нафар фаластинлик маҳбус, шунингдек, Ғазо секторидаги 13 нафар исроиллик ва 5 нафар тайлик маҳбус озод қилинди.
8 февраль куни Исроил армияси уч нафар исроиллик асирнинг озод этилишига жавобан 183 нафар фаластинлик маҳбусни қамоқдан чиқарди. Улардан 18 нафари умрбод, 54 нафари эса узоқ муддатли қамоқ жазосига ҳукм қилинган. Яна 111 нафари 2023 йил 7 октябрда Исроил ҳужумлари бошланганидан кейин Ғазо секторида қўлга олинган фаластинликлардир.
Умуман олганда, ўт очишни тўхтатиш тўғрисидаги келишувни амалга ошириш уч босқичда ўтказилади. 42 кун давом этадиган келишувнинг биринчи босқичи доирасида 1900 дан ортиқ фаластинлик ва 33 нафар исроиллик озод қилиниши кутилмоқда.
Изоҳ (0)