“Тошкент метрополитени” ДУК ва “COSCOM” МЧЖ (Ucell савдо белгиси) ҳамкорлик ва ўзаро алоқаларни ривожлантириш бўйича меморандум имзолади. Ушбу ҳужжатнинг мақсади - шериклик муносабатларини давом эттириш ва мустаҳкамлаш, узоқ муддатли, самарали ва ўзаро манфаатли ҳамкорликни ривожлантириш ҳамда қўшма лойиҳаларни амалга оширишга йўналтирилган.
Метрополитен ва Ucell ўзаро ҳамкорлик бўйича етарлича катта тажрибага эга. Бугунги кунда шаҳарнинг ер ости метросини сифатли мобил алоқа билан таъминлаш бўйича кенг қамровли лойиҳа амалга оширилмоқда. Натижада, икки томоннинг саъй-ҳаракатлари билан метрополитеннинг 43 та бекати юқори тезликдаги 3G, 4G ва 5G тармоқларига уланиш имкониятига эга бўлди.
Андрей Шишковский, Ucell бош директори:
“2024 йил июль ойида лойиҳалаш ва изланиш ишларининг фаол босқичи бошланганидан бери компания 12 та ер усти бекати ва барча 31 та ер ости бекати инфратузилмасини муваффақиятли модернизация қилди. Ҳозирги вақтда туннеларнинг ярмидан кўпи сифатли интернет хизматларини тақдим этиш учун зарур технологиялар билан жиҳозланган. Биз Ucell абонентларига ҳатто метрода ҳам алоқа имкониятини тақдим этаётганимиздан мамнунмиз. Бу Тошкент метрополитени билан самарали ҳамкорлик ва ҳар иккала томоннинг замонавий технологияларни жорий этишга бўлган интилиши натижасида амалга ошди.”
Элтаев Элёр Рустамович “Тошкент метрополитени” ДУК бошлиғининг маркетинг масалалари бўйича ўринбосари:
“2024 йил ноябрь ойидан бошлаб бекатларга янги радио ускуналар ўрнатиш ва метронинг энг узун ҳамда мураккаб релефга эга бўлган “Чилонзор” бекатидан “Олмазор” бекатигача бўлган ер ости қисмида синов ишлари ўтказилди. Ушбу ускуналарнинг ишга туширилиши йўловчиларга мобил оператор хизматларидан ҳеч қандай ноқулайликларсиз фойдаланиш имконини беради. Умуман олганда, тармоқни ишга тушириш 2025 йил давомида босқичма-босқич амалга оширилиши режалаштирилган бўлиб, бу пойтахт аҳолиси ва меҳмонлари учун хизмат сифатини яхшилаш йўлидаги муҳим қадам бўлади.”
Тошкент метросини алоқа билан таъминлаш лойиҳаси нафақат телекоммуникациялар ривожига қаратилган ташаббус, балки барча фойдаланувчилар учун қулай шаҳар инфратузилмасини яратишга қўшилган муҳим ҳиссадир.
Компания ҳақида: Ucell - GSМ, UMTS, LTE ва 5G стандартларидаги мобил алоқа оператори, Ўзбекистондаги мобил алоқа бозорида етакчи компания. Компаниянинг хизматларидан 9,5 миллиондан ортиқ абонент фойдаланади. 2024 йилда компаниянинг тўғридан-тўғри инвестициялари 136 миллион АҚШ долларидан ортиқни ташкил этди. Сўнгги уч йил ичида Ucell Ўзбекистондаги телекоммуникация саноати ва рақамли иқтисодиётнинг ривожланишига 389 миллион доллар сармоя киритди.
Ucellда 2200 нафар юқори малакали мутахассислар ишлайди. Компаниянинг мақсади: “Оддий, ҳамёнбоп ва ишончли хизматларни тақдим этамиз – инсонлар билан ва улар учун ишлаймиз”.
Реклама ҳуқуқи асосида.
Изоҳ (0)