Равшан Усмонов Ўзбекистоннинг Исландиядаги (қароргоҳи Лондон шаҳрида жойлашган) элчиси этиб тайинланди. Бу ҳақда “Дунё” АА хабар берди.
Элчи Исландия президенти Халла Томасдоттирга ишонч ёрлиқларини топширди.
Расмий маросимдан сўнг бўлиб ўтган мулоқот чоғида Ўзбекистон ва Исландия ўртасидаги ҳамкорликни ривожлантириш истиқболлари бўйича фикр алмашилди. Савдо-иқтисодий, маданий ва туризм соҳаларида алоқаларни жадаллаштириш масалаларига алоҳида эътибор қаратилди.
Исландия етакчиси энергетика, юқори технологиялар ва рақамлаштириш, балиқчилик, туризм ҳамда атроф-муҳитни ҳимоя қилиш каби соҳалардаги ҳамкорлик икки томонлама манфаатли бўлишини таъкидлади.
Учрашув якунида Исландия президенти Халла Томасдоттир Ўзбекистон раҳбарияти ва халқига фаровонлик ҳамда бардавом тараққиёт, Ўзбекистон элчисининг икки томонлама муносабатларни ривожлантириш ва кенгайтириш йўлидаги ишларига эса муваффақиятлар тилади.
Маълумот учун, Ўзбекистон ва Исландия ўртасидаги дипломатик муносабатлар 1997 йил 25 сентябрда ўрнатилган.
Равшан Усмонов 2023 йилнинг ноябрида Ўзбекистоннинг Буюк Британиядаги элчиси этиб тайинланганди. Унга қадар 2018 йилдан буён Ўзбекистоннинг Малайзиядаги элчиси эди.
Изоҳ (0)