Дунёда спорт маҳсулотларини ишлаб чиқариш бўйича энг йирик компаниялардан бири бўлган Nike ўз истеъмолчиларини ҳайратда қолдиришдан тўхтамайди. Компания бир неча йиллар давомида спортчилар қулайлиги учун янги маҳсулот ишлаб чиқариш устида изланди ва саломатлик технологиялари билан иш олиб борувчи йирик корхона — Hypericе билан ҳамкорликда иккита ноодатий қурилмани тақдим этди.
Биринчи гаджет оёқларни уқаловчи махсус пойабзал бўлиб, у уч хил режимда ишлайди. Кроссовкалар бадантарбия вақтида оёқ тўпиғидан тортиб бармоқларгача уқалайди. Қурилма батарея орқали қувват олади. Қулай жиҳати шундаки, ҳар бир пойабзалдан алоҳида фойдаланиш мумкин.
Иккинчи гаджет юқори технологияли жилет бўлиб, жисмоний машқлар пайтида тана ҳароратини кузатиб боради ва уни назорат қилишга ёрдам беради.
“Бир йил аввал ушбу гаджетларни янада такомиллаштириш ишлари олиб борилаётган вақтда Nike ва Hypericе пойабзаллари ва жилетни синаб кўрдим ва шуни англадимки, ушбу янгиликлар спортчиларнинг кундалик фаолиятини янги босқичга олиб чиқади”, — деди баскетболчи Леброн Жеймс.
Инновацион маҳсулотлар, асосан, профессионал спортчилар учун мўлжалланган бўлса-да, улар барча учун фойдалидир. Сиз ҳатто офисда ишлаётганингизда ҳам қурилмалардан фойдаланишингиз мумкин. Бу ҳақда Nike Athlete Innovation компаниясининг директори Тоби Хетфилд ўз фикрларини билдирди:
“Hypericе билан ҳамкорликда ишлаб чиқилган пойабзал ва жилет чемпионлик унвони учун ўйнаяпсизми ёки ишда узоқ вақт оёқда турган вақтда фойдаланяпсизми — гаджетлар барча учун бирдек ёрдам беради”.
Nike ўзининг янги маҳсулотлари қачон сотувга чиқарилишини кейинроқ хабар беради.
Изоҳ (0)