Туркманистонда ажралишни расмийлаштириш учун давлат божи беш баравар ошди. Бу ҳақда Озодлик радиоси хабар берди.
Бу фуқароларининг ажрашишни кейинроққа қолдиришга мажбур қилмоқда.
“Никоҳни бекор қилиш тўғрисидаги ариза билан судга ким мурожаат қилишидан, эркак ёки аёл бўлишидан қатъи назар, улардан 6000 манат (3 500 доллардан ортиқ) миқдорида давлат божи тўлаш талаб қилинмоқда”, дейди ашхободлик аёл.
Тахминан олти ой олдин бож миқдори 1200 манат (салкам 706 доллар) эди. Фуқароларга божлар қачон оширилгани ҳақида аниқ тушунтириш беришмаган.
“Улар фақат фуқароларнинг ишлари тўловдан кейингина кўриб чиқилишини айтмоқда”, дейди Ашхободнинг яна бир аҳолиси.
Никоҳни бекор қилиш тартиби Туркманистон Оила кодексининг 5-бобида белгиланган. Агар эр-хотиндан бири ажрашишга рози бўлмаса ёки оилада вояга етмаган ёхуд меҳнатга лаёқатсиз фарзандлар бўлса, ажрашиш ариза берувчининг яшаш жойидаги туман (шаҳар) суди томонидан амалга оширилади.
Никоҳдан ажратиш эр-хотиннинг биргаликдаги аризаси асосида, ариза берилган кундан эътиборан икки ой ўтгач, ФҲДЁ органи томонидан амалга оширилади. Туркманистонда иқтисодий қийинчиликлар ва кенг тарқалган ишсизлик шароитида никоҳни бекор қилишга қарор қилган кўплаб фуқаролар 5 баравар қимматлашган давлат божини тўлай олмаяпти.
“Никоҳни бекор қилиш тўғрисидаги ариза билан судга мурожаат қилган кўплаб эр-хотинлар давлат божини тўлаш учун зарур бўлган маблағни йиғмагунча ажрашишни кечиктиришга мажбур. Чунки одамлар ойига 1500-2000 манатдан (салкам 900-1200 доллар) олади ва зўрға кун кечирмоқда”, дейди ашхободлик аноним манба.
Таъкидланишича, сўнгги йилларда ажрашишга қарор қилган оилавий жуфтликлар сони сезиларли даражада ошиб бормоқда ва аксарият ҳолларда бундай оилалар Туркия ёки Россияда меҳнат миграциясида бўлиб турибди.
Изоҳ (0)