Туркияда жиноят содир қилиб, 3 йилдан бери қидирувда бўлган ўзбекистонлик аёл мамлакатга депортация қилинди. Бу ҳақда Ўзбекистоннинг Истанбулдаги Бош консулхонаси хабар берди.
Унга кўра, Туркия ва Ўзбекистон Ички ишлар вазирликлари ҳамкорлигида ўтказилган тезкор тадбир давомида жорий йилда Истанбул шаҳрида қўлга олинган, фирибгарлик жиноятларини содир этганликда айбланиб, 2021 йилдан буён қидирувда бўлган Раҳматова Шоҳиста бугун Бош консулхона ходимлари иштирокида Ўзбекистонга депортация қилинди.
Ушбу шахснинг хатти-ҳаракатларидан жабр кўрган фуқаролардан Ўзбекистоннинг Истанбул шаҳридаги Бош консулхонасига ёки Ўзбекистон Ички ишлар вазирлиги ёхуд унинг қуйи тизимларига мурожаат қилиш сўралди.
Таъкидланишича, жиноий жавобгарликдан қочиб, хорижий давлатларда, шу жумладан, Туркияда яшириниб юрган ҳар бир шахсга нисбатан жиноий таъқиб изчил равишда давом эттирилади ва жиноят учун жавобгарлик принципи қатъий таъминланади.
Шу билан бирга, кейинги вақтларда кўплаб фирибгарлик ҳолатлари юзасидан Бош консулхонага келаётган мурожаатлар сони ортганини инобатга олиб, фуқаролардан фирибгарлардан огоҳ бўлиш сўралди.
Бундан аввал Туркияга чиқиб кетган ўзбекистонлик йигит бедарак йўқолгани хабар қилинганди. Шунингдек, Туркияда 4 йилдан буён тутқунликда сақлаб келинган ўзбекистонлик аёл қутқарилгани ҳақида хабар берилганди. Ташқи ишлар вазирлиги орқали Қарши шаҳридан 21 ёшли фуқаро ўз онасининг Истанбулга 4 йил олдин кетгани, 3 йилдан бери алоқага чиқмаётганини айтиб, онасини топиш ва ватанга қайтаришда ёрдам сўраган. Туркия қонунчилигига биноан шахсни эркига хилоф равишда тутқунликда сақлагани учун туркияликка нисбатан жиноят иши қўзғатилди.
Изоҳ (0)