Фирибгарлик ва одам савдоси жиноятларини содир этишда айбланиб, Туркияда ушланган эркак 23 май куни Ўзбекистонга депортация қилинди. Бу ҳақда Ўзбекистоннинг Истанбулдаги бош консулхонаси хабар берди.
1979 йилда Самарқанд вилоятида туғилган Озод Раҳимов Туркия ва Ўзбекистон Ички ишлар вазирликлари ҳамкорлигида ўтказилган тезкор тадбир давомида 6 май куни Истанбулда қўлга олинганди.
У Самарқанд вилоятида фуқароларнинг кўп миқдордаги пул маблағларини фирибгарлик йўли билан ўзлаштиришда, шунингдек, Истанбул шаҳрида бўлган даврида 2022—2023 йиллар мобайнида бир қанча Ўзбекистон ва Тожикистон фуқароларини Туркия—Испания—Никарагуа—Мексика йўналиши бўйлаб АҚШга юборишни ваъда қилиб, фирибгарлик йўли билан уларнинг ҳар биридан 10-15 минг доллар олиб, ваъдасини бажармасдан, ўзининг шахсий манфаатларига ишлатиб юборганликда айбланмоқда.
Ушбу шахснинг жиноий хатти-ҳаракатларидан жабр кўрган фуқаролардан бош консулхонага ёки Ўзбекистон ИИВга хабар бериш сўралди.
Бош консулхона сўнгги вақтларда АҚШ, Канада ёки Европа давлатларга бориш учун виза расмийлаштириб бериш важи билан фирибгарлик содир этилиши ҳолатлари юзасидан келаётган мурожаатлар сони ортгани сабаб фуқаролардан фирибгарларга алданиб қолишдан огоҳ бўлишга чақирди.
Изоҳ (0)