Лондонда Туркия элчихонаси яқинида номаълум шахс Қуръон ёқиш акциясини уюштирди, деб хабар бермоқда Daily Mail.
Уни тўхтатиш учун яна бир эркак намойишчига пичоқ билан ҳужум қилиб, калтаклаган.
Британия матбуоти хабарига кўра, воқеа 13 февраль куни тушдан кейин содир бўлган. Тарқалган видеоларда намойишчи эркак ёниб турган китобни ушлаб турганини кўриш мумкин. Шундан сўнг катта ёшли эркак уни тепиб, ерга йиқитгач ёнаётган китобни тортиб олган.
Маълум қилинишича, ҳужум қилган шахс ёнида пичоқ олиб юрган ва у билан Қуръон ёқувчига зарба бермоқчи бўлган.
Қуръонни ёққан шахс жароҳатлар билан шифохонага етказилган. Унинг фақат бармоқлари лат егани аниқланган, ҳеч қандай пичоқ жароҳати олмаган. Ҳужум қилган эркак совуқ қурол сақлаш ва оғир тан жароҳати етказишда гумонланиб, ҳибсга олинган.
Даниянинг “Қаттиқ курс” партияси етакчиси Расмус Палудан 1 февраль куни муқаддас Қуръони карим нусхасини яна ёқиб юборган эди.
Бу Расмуснинг Қуръонни ёқишига оид биринчи ҳолат эмас. У 2023 йил январь ойида Стокгольмдаги Туркия элчихонаси олдида Қуръонни ёқиб юборганди, бир неча кундан сўнг Даниядаги масжид эшиги олдида ҳам шундай қилган.
Ўшанда нафақат маҳаллий ҳокимият рухсати билан, балки полиция назорати остида ҳам ўтказилган ҳар икки ҳаракат мусулмон мамлакатларида ўта салбий муносабатга сабаб бўлган. Туркия ҳатто Швециянинг НАТОга аъзо бўлиш ҳақидаги аризасини блоклаш билан таҳдид қилган. Бироқ кейинроқ Швеция полицияси Стокгольмдаги бош масжид яқинида Қурбон ҳайитининг биринчи кунида Қуръонни ёқишга рухсат берган.
Мазкур ҳаракатлардан сўнг Дания парламенти диний матнларни ёқишни тақиқловчи қонунни қабул қилган. Бундай ҳаракатлар учун икки йилгача озодликдан маҳрум қилиш жазоси берилади.
Қуръонни ёққан ироқлик эркак ўлдириб кетилди
29 январь куни Швециянинг Сёдертеле шаҳрида 2023 йилда Қуръонни бир неча бор ёққани ортидан танилган ироқлик Салван Момика отиб кетилди. Эркак TikTok'да жонли эфир олиб бораётган пайтда ҳужумга учраган. Ҳолат юзасидан 5 киши ҳибсга олинган.
Салван Момика 2018 йилда Ироқдан Швецияга келган, 2021 йилда уч йиллик яшаш рухсатномасини олган. 2024 йил ёзида унинг вақтинчалик яшаш рухсатномаси бир йилга узайтирилган. Швеция прокуратураси Момикага “нафрат қўзғатиш” моддаси бўйича айблов қўйган.
У 2023 йил ёзида Стокгольмнинг тўрт жойида Қуръонни ёқиб юбориш билан боғлиқ тўртта ҳолат бўйича айбланган. Ироқ Швециядан Қуръонни ёқиб юборган фуқаросини топширишни талаб қилган. Қуръон ёқилгани акс этган кадрлар жиноий қилмишлар далили ҳисобланади. 30 январь куни суд Момикага қарши ҳукм чиқариши керак эди. Аммо “ўлим тасдиқлангани” туфайли суд ҳукмини эълон қилиш кечиктирилган.
Изоҳ (0)