Туркияда қўлга олинган эркак Ўзбекистонга депортация қилинди, деб хабар бермоқда Бош консулхона ахборот хизмати.
![](/static/2024/09/10/kuh-R9h4IAGj.jpg)
Маълум қилинишича, Туркия ва Ўзбекистон Ички ишлар вазирликлари ҳамкорлигида ўтказилган тезкор тадбир давомида жорий йилда Истанбул шаҳрида қўлга олинган Дониёр Муқимжонов Бош консулхона ходимлари иштирокида Ўзбекистонга депортация қилинди.
У 2022—2023 йилларда ишончга кириш йўли билан ўзгаларнинг умумий ҳисобда қарийб 60 минг АҚШ долларини фирибгарлик йўллари билан ўзлаштирганликда айбланиб, 2023 йилдан буён қидирувда бўлган.
Ушбу шахснинг хатти-ҳаракатларидан жабр кўрган фуқаролардан Ўзбекистоннинг Истанбул шаҳридаги Бош консулхонасига ёки Ички ишлар вазирлиги ёхуд унинг қуйи тизимларига мурожаат қилиш сўралди.
Қайд этилишича, жиноий жавобгарликдан қочиб хорижий давлатларда, шу жумладан, Туркияда яшириниб юрган ҳар бир шахсга нисбатан жиноий таъқиб изчил равишда давом эттирилади ва жиноят учун жавобгарлик принципи қатъий таъминланади.
Шу билан бирга, кейинги вақтларда фирибгарлик содир этилиши ҳолатлари юзасидан Бош консулхонага келаётган мурожаатлар сони ортганини инобатга олиб, фуқаролардан фирибгарлардан огоҳ бўлиш сўралди.
Изоҳ (0)