COVID-19’га қарши тезкор ва самарали эмлаш кампанияси шарофати билан Исроил дунёда вирусни енгган биринчи мамлакатга айланди. Бу ҳақда мамлакат бош вазири Бинямин Нетаньяху маълум қилди, деб ёзади The Times of Israel.
Таъкидланишича, ҳукумат раҳбари Америка телеканалига «яшил COVID-паспортлар» ҳақида интервью берган.
«Исроил — коронадан чиқиб олган дунёдаги биринчи мамлакат. Бу ‘яшил’ паспорт билан сиз ресторанларга, театрларга, спорт тадбирларига боришингиз мумкин. Бу ўша. Биз чиқяпмиз», — деди Нетаньяху.
Унинг сўзларига кўра, Исроил ҳукумати март ойи охиригача мамлакатнинг вояга етган барча аҳолисини коронавирусга қарши эмлашни ва апрелга келиб, унинг чегараларини тўлиқ очишни режалаштирмоқда.
«Илгари Исроил стартаплар мамлакати сифатида машҳур эди. Бугунги кундан бошлаб у вакцинация юрти деб ҳам аталади. Биз дунё учун модель ўрнатяпмиз, биз бундан жуда фахрланамиз», — дея таъкидлади бош вазир.
Аввалроқ Исроил ҳукумати «яшил паспорт»ни жорий қилган эди, у COVID-19’га қарши эмланган ёки вирус билан касалланиб ўтган фуқароларга берилади. Шундай ҳужжатлар илк марта 21 февралдан берила бошлади.
Февраль ўрталаридаёқ Исроил аҳолини коронавирусга қарши эмлаш тезлиги бўйича дунёда етакчи бўлиб қолаётгани айтилганди. Мамлакат Соғлиқни сақлаш вазирлигининг 16 февралдаги маълумотларига кўра, бутун аҳолининг 28 фоиздан ортиғи, катталарнинг (16 ёшдан ошганлар) эса 39 фоизга яқини тўлиқ эмланган. «2021 йил марти охирига келиб 16 ёшдан катта бўлган исроилликларнинг барчаси Pfizer/BioNTech вакцинаси билан эмлана олади», — дея мамлакат бош вазири Бинямин Нетаньяху февраль бошида эълон қилган эди.
Аввалроқ Бирлашган Араб Амирликлари (БАА) коронавирусга қарши оммавий иммунитетга эришган биринчи мамлакат бўлиши мумкинлиги, чунки аҳолининг катта қисми вирусга қарши эмланиб бўлгани маълум қилинганди. Our World in Data онлайн нашрининг маълумотларига кўра, БАА аҳолисини коронавирусга қарши эмлаш даражаси бўйича Исроилдан кейин иккинчи ўринда турибди. Сўнгги маълумотларга кўра, БАА аҳолисининг 60 фоизидан кўпроғи шу кунгача камида бир дозада COVID-19 вакцинасини олган.
Россияда эса коронавирусга қарши вакцинанинг иккала компонентини ҳам олган фуқаролар 2 миллион кишини ташкил қилмоқда (аҳолининг умумий сони — 146,2 миллион киши). Бу ҳақда 4 март куни Россия президенти Владимир Путин маълум қилди. Шунингдек, яна 2 миллионга яқин одам эмлашнинг биринчи босқичидан ўтган. 2021 йилнинг июнига келиб эмланган фуқаролар сони 40 миллион кишига етиши тахмин қилинмоқда. Бу ҳақда Россия тўғридан-тўғри инвестициялар фонди директори Кирилл Дмитриев маълум қилди.
АҚШда фуқаролар аҳолини эмлаш жадвалидаги режадан бир неча ҳафта олдинроқ — 25 февраль куни 50 миллион дозада COVID-19 вакцинасини қабул қилди. «Президентлик фаолиятини бошлаганимдан бери 37 кун ичида эллик миллион аҳоли эмланди (аҳолининг умумий сони — 331,4 миллион киши). Режа ҳатто сўнгги кунлардаги совуқ бўронлар оқибатида юз берган кўнгилсизликларга қарамай, муддатидан бир неча ҳафта олдинроқ бажарилди», — деди Байден. Байден президентлик лавозимига киришган пайт биринчи 100 кун ичида 100 миллион америкаликни эмлашни мақсад қилган эди. Айни вақтда эса, Гарварднинг Америка сиёсий тадқиқотлар маркази (Harvard CАПС) ва Harris Poll компаниясининг сўровномаларига кўра, АҚШ аҳолисининг деярли 41 фоизи COVID-19’га қарши эмланишни истамайди.
26 январь куни Тожикистон президенти Эмомали Раҳмон ўзининг парламентга анъанавий йиллик мурожаатида мамлакатда коронавирус устидан ғалаба қозонилганини маълум қилганди. Ўшанда 11 январдан буён мамлакатда бирорта ҳам коронавирусга чалиниш ҳолати қайд этилмагани хабар берилганди.
20 февраль ҳолатига кўра, дунё бўйича 200 269 332 киши эмланган, бу бутун сайёра аҳолисининг 2,6 фоизи демакдир. Шу билан бирга, АҚШ, Хитой, Буюк Британия ва Ҳиндистон ҳиссасига барча эмланганларнинг қарийб 65 фоизи тўғри келади.
Жаҳон соғлиқни сақлаш ташкилоти (ЖССТ) май ойи охирига қадар коронавирусга қарши вакциналарни адолатли тақсимлаш бўйича COVAX механизми доирасида 142 мамлакатга камида 237 миллион доза препарат етказиб берилишини кутмоқда. ЖССТ 190 мамлакат ва иқтисодиётни ўз ичига олган COVAX механизмининг аҳамиятини ниҳоятда катта деб ҳисоблайди. Ушбу дастур шартига кўра, юқори даромадли мамлакатлар кам таъминланган давлатларга вакцина харид қилиш учун маблағ ажратади. Режаларга кўра, ушбу механизм доирасида 2021 йил охирига қадар 2 миллиард доза коронавирусга қарши вакцина ишлаб чиқарилиши ва дунё бўйлаб тенг тақсимланиши керак.
Шу билан бирга, ЮНЕСКО маълумотларига кўра, дунёнинг 130 дан ортиқ мамлакатлари, шу жумладан, энг заиф давлатлар аҳолиси ҳам COVID-19’га қарши вакцинанинг биринчи дозасини ҳали олмаган. Унинг ҳисоб-китобларига кўра, вакцинация билан боғлиқ ҳолат ўзгармаса, ривожланаётган мамлакатлар энг камида 2021 йилнинг охиригача вакцина ололмайди.
Изоҳ (0)