Словакия ва Греция президентлари COVID-19’га қарши эмланди

Словакия президенти Зузана Чапутова коронавирусга қарши эмланди, деб ёзади «РБК» давлат раҳбари сайтига таяниб.

У вакцинацияни COVID-19’ни енгиш ва «ҳаётни нормал оқимга қайтариш»нинг «ягона усули» деб ҳисоблайди. «Шунинг учун мен соғлиқни сақлаш вазирининг таклифини қабул қилиб, бугун вакцина олдим», — деди Чапутова.

Словакияда 27 декабрь куни аҳолини эмлаш бошланди. Президент коронавирус инфекциясига қарши эмланган биринчи одам бўлди. У вакцинани Братислава университет касалхонасида олди. Шунингдек, ҳукумат ва парламент аъзоларининг баъзилари ҳам эмланди. Биринчи навбатда шифокорлар ҳам вакцина олади.

Грецияда президент Катерина Сакелларопулу ва бош вазир Кириакос Мицотакис биринчилардан бўлиб коронавирусга қарши эмланди. Сакелларопулу Афинадаги «Эвангелисмос» касалхонасида, ҳукумат раҳбари эса «Аттикон» университет касалхонасида вакцина олди. Мицотакис ҳам вакцинани COVID-19’га қарши ягона восита деб атади.

27 декабрдан Европа мамлакатлари ўз аҳолисини коронавирус инфекциясига қарши эмлашга киришди. Евроиттифоқ ҳозирча фақат битта дорини — Американинг Pfizer ва Германиянинг BioNTech компаниялари томонидан ишлаб чиқилган вакцинани қўллашга рухсат берган. Хусусан, Германия, Франция, Испания, Австрия, Болгария, Чехия ва Италия аҳолиси вакцина олишни бошлади.

Аввалроқ Россия президенти Владимир Путин коронавирусга қарши эмланиш ниятини билдирган эди.

Шу пайтгача АҚШнинг сайланган президенти Жо Байден, АҚШ вице-президенти Майк Пенс, Исроил бош вазири Биньямин Нетаньяху коронавирусга қарши вакцина олган, бу жонли эфир орқали намойиш этилган эди.