Жо Байден маъмурияти АҚШда киберхавсизлик соҳасини ривожлантиришга 20 миллиард доллар йўналтиради. Бу мамлакат президенти томонидан аввал тақдим этилган умумий миқдори 2,3 триллион долларлик янги иш ўринларини яратиш режасини (The American Jobs Plan) амалга ошириш доирасида бажарилади. Бу ҳақда Оқ уй баёнотига таяниб «ТАСС» хабар берди.
«Киберхавфсизлик ҳозирги замоннинг энг долзарб масалаларидан бири ҳисобланади, шунинг учун президент Байден АҚШда киберхавфсизликни кучайтиришни устувор вазифага айлантирди ва ушбу вазифани бажариш учун чоралар кўра бошлади», — дейилади баёнотда.
Таклиф этилаётган режа доирасида федерал даражадан маҳаллий ўзини ўзи бошқариш органлари даражасига қадар миллий энергетика инфратузилмасига киритилган компьютер тизимларини модернизация қилиш соҳасига 20 миллиард доллар инвестиция киритиш таклиф қилинди. Ушбу маблағлар ҳаётга татбиқ этиладиган янги лойиҳаларни амалга ошириш ҳамда фаолият юритаётган энергия ва электрон тизимларнинг хавфсизлигини кучайтириш учун сарфланади.
Модернизациялашда сўнгги технологиялардан фойдаланилади, хавфсизлик ва атроф-муҳитни муҳофаза қилиш соҳасида энг сўнгги стандартлар қўлланилади.
«Байденнинг The American Jobs Plan дастури ҳар бир америкаликка арзон, ишончли, тезкор ва кенг миқёсли интернетга уланиш имкониятини беради. Шунингдек, ушбу тарихий инвестиция тармоқ хавфсизлигини таъминлаш учун хизмат қилади», — дейилади Оқ уй баёнотида.
Ушбу ишларнинг бажарилишини осонлаштириш ва уларни бажаришга пудратчиларни жалб қилиш мақсадида белгиланган модернизацияни амалга ошириш учун шарт-шароитлар яратадиган компаниялар учун солиқ ва кредит имтиёзлари чоралари ишлаб чиқилади.
Аввалроқ Жо Байден собиқ президент Дональд Трамп томонидан 2020—2021 йилларда имзоланган еттита фармонни бекор қилгани ҳақида хабар берилди.
Президентликнинг биринчи куниёқ Байден Трамп томонидан қабул қилинган бир нечта фармонларни бекор қила бошлаган эди. Хусусан, Байден Трампнинг иқлим бўйича Париж битими ва ЖССТдан чиқиш тўғрисидаги қарорларини ҳамда мамлакатга айрим тоифадаги чет элликларнинг киришини тақиқловчи ҳужжатни бекор қилган.
Мавзуга доир:
Изоҳ (0)