Инсайдерлар маълумотларига кўра, Елизавета II вафотидан кейин қирол Чарльз 500 миллион фунт стерлингга яқин мерос олган. Ўшанда бу сумма ҳайратланарли эди, аммо аслида бу монарх ва унинг оиласи даромадларининг денгиздаги бир томчиси холос. Қироллик аъзолари ўзларининг ҳашаматли ҳаётларини қандай молиялаштириши ва уларнинг қайси бири бойроқ экани ҳақида маълумот берамиз.
Суверен грант
2011 йилда қироллик оиласи ҳукуматга даромадли ерларининг катта қисмини, жумладан, фермалар ва тоғ-кон комплексларини берди. Бунинг эвазига ҳукумат икки йиллик ер даромадининг 25 фоизини монархга беради. Мисол учун, 2023 йилда Чарльз III 86,3 миллион фунт стерлинг олган.
Суверен грант маблағлари асосан “қиролнинг расмий ҳаёти” учун сарфланади: ходимлар, саройларни сақлаш, бал ва тантаналар ташкил қилиш харажатлари учун. Аммо қирол оиласига ҳам маблағ ажратишга ҳақли.
Букингем саройи, Кларенс-Ҳаус ва бошқа монархнинг қароргоҳлари қиролга “тож ҳуқуқи билан” тегишли — у бу жойларда таъмирлаш ишлари олиб бориши, яшаши, хизматкорларни алмаштириши мумкин, лекин уларни сотиши мумкин эмас. Шундай қилиб, қироллик оиласининг қиймати 9,5 миллиард доллар бўлган мулклари ҳеч қачон ҳеч бир қиролга тегишли бўлмайди.
Аммо Чарльз III нинг шахсий кўчмас мулклари ҳам бор. Масалан, Шотландиядаги Balmoral қасри 118 миллион, Норфолкдаги Сандрингем қароргоҳи 73 миллион долларга тенг ва у истаган пайтда уларни сотиши мумкин.
Шаҳзода Уилям ва малика Кетриннинг тўйида қиролича уларга ХIX асрга оид Сандрингемдаги Анмер-холл қароргоҳини совға қилган. Шунингдек, уэлсликларнинг Виндзор қасридаги Аделаида коттежида ҳам қароргоҳи бор, улар 2022 йилда у ерга кўчиб ўтган ва ҳозир шу ерда яшайди. Албатта, Лондонга ташриф буюрганларида улар Кенгсингтон саройидаги 20 хонали тўрт қаватли таунхаусга жойлашади.
Шаҳзода Гарри ва Меган Маркл
Манбаларга кўра, Меган ва Гаррининг асосий пул активи уларнинг Монтеситодаги уй-жойидир. Сассекслар Калифорнияга кўчиб ўтишлари биланоқ элита қишлоғидаги уйни 14,95 миллион долларга сотиб олишган. Улар бу уйни ипотекага олишган — 5 миллион долларни бирданига тўлашган, аммо деярли 10 миллион долларни неч йилда беришлари номаълум.
Малика Анна
1976 йилда Элизабет II қизига Глостерширдаги Гатcомбе Парк мулкини сотиб олди. Ўшанда қиролича унинг учун тахминан 750 000 фунт тўлаган, аммо ҳозир ер-мулкнинг қиймати тахминан 29 миллион долларни ташкил қилади. Малика ҳали ҳам мулкдаги хонадонлардан бирида яшайди, қўшни хонадонда эса Зара ва Майк Тиндолл болалари билан яшайди. Шунингдек, Аннанинг Лондондаги Сент-Жеймс саройида шахсий қароргоҳи ҳам бор.
Мерос
Чарльз III
Ҳозирча Чарльз мерос миқдори бўйича рекордчи ҳисобланади. Аввал айтганимиздек, қиролича Елизавета II катта ўғлига тахминан 500 миллион доллар мерос қолдирган — бир қисми нақд пулда, қолган қисми эса заргарлик буюмлари ва санъат асарлари кўринишида. Шунингдек, Чарльз 1399 йилдан буён ҳар бир монархга ўтадиган Ланкастер герцоглигини бошқаради. Аммо у кўчмас мулкка кирмайди, чунки қирол герцогликка эгалик қилмайди ва уни сота олмайди — у фақат ҳар йили ундан даромад олади. 2022 йилда монарх герцоглик даромадидан 24 миллион фунт стерлинг олган.
Шаҳзода Уилям
Уилям 30 ёшга тўлганида, малика Дианадан мероснинг ўзига тегишли бўлган қисмига рухсат олди — манбаларга кўра, бу 12,5 миллион долларни ташкил этди. Шунингдек, унга онасидан зеб-зийнатлар мерос қолган, масалан, маликанинг ёқут ва бриллиантли никоҳ узуги ва бошқалар.
Шаҳзода Гарри
Гарри ҳам 12,5 миллион доллар мерос олди — бу пулсиз у ва Меган Калифорнияга кўчиб ўтиша олмасди. Диананинг қолган мол-мулки ва пуллари унинг 17 нафар чўқинтирган фарзанди ва эшик оғаси Пол Барелл ўртасида тақсимланди.
Аммо Гарри билан боғлиқ бир тушунарсиз жиҳат бор. Опрага берган интервьюсида у Британия қироллик оиласидан чиқиб кетганидан кейин молиявий ёрдам тўхтатилганини айтган. Бироқ 2021 йилда Кларенс-Ҳаусдаги манба қирол Чарльз Гарри ва Меган Марклга мустақил яшаш учун “сезиларли миқдорда” маблағ берганини маълум қилган эди.
Малика Кетрин
Тахт вориси билан турмуш қуришдан олдин малика ота-онасининг компаниясида ва кийим-кечак сотиладиган онлайн дўконда ишлаган, лекин мутахассисларнинг фикрича, бу унга катта бойлик келтирмаган. Бироқ Кейт ота-онасининг бизнесини сотишдан даромад олиши мумкин эди — Керол ва Майкл Миддлтон 2023 йилда байрамларни ташкиллаштириб берувчи компанияси Party Пиэcесъни сотишган.
Шунингдек, Кейт Суверен жамғармадан оладиган маблағ ва шаҳзода Уилям, қирол Чарльз ва қиролича Елизавета II томонидан совға қилинган заргарлик буюмларига ҳам эга.
Шахсий даромад
Чарльз III
Қирол ва шаҳзодалар ҳам ишлайди — айниқса ҳозирги кунда, монархия халққа яқинроқ бўлишга интилаётган пайтда. Масалан, 1990 йилда қирол Чарльз ўзининг Глостершир шаҳридаги фермасида етиштирилган маҳсулотларни сотиш учун Дучй Originals органик маҳсулотлар брендини ташкил қилган. Натижада кичик бир фирма Буюк Британиядаги энг йирик органик маҳсулотлар брендига айланди. Аммо Чарльз бу сотувлардан келган даромадни ўзига олмайди — барча маблағ Уэлс шаҳзодаси хайрия фондига йўналтирилади. Масалан, 2009 йилдан бошлаб фонд 42,6 миллион доллар олган.
Қирол Чарльзнинг экологиядан ташқари иккинчи иштиёқи — расм чизиш. У ҳали шаҳзода Чарльз бўлган пайтда ҳам Буюк Британиядаги энг муваффақиятли рассомлардан бирига айланган. Чарльз акварелда ландшафт манзараларини чизиб, уларни хайрия тадбирларида намойиш қилган. Маълумотларга кўра, 1997 йилдан 2006 йилгача Чарльз тахминан 2,5 миллион доллар даромад олган ва ҳар бир долларни Уэлс шаҳзодаси хайрия фондига юборган.
Шаҳзода Уилям
Чарльз III кўпроқ ижодга мойил бўлса, Уилям доимо армияда хизмат қилган. 2006 йилда у Британия Қироллик ҳарбийларига қўшилиб, Қидирув-қутқарув кучлари вертолёт учувчиси бўлган ва йиллик маоши 74 000 долларни ташкил этган. 2013 йилда Уилям истеъфога чиқади, лекин икки йил ўтиб қайтиб, ҳаво тез ёрдамида учувчи бўлиб ишлайди ва йиллик 62 000 доллар маош олади. Мутахассисларнинг таъкидлашича, ушбу ишидан келган барча даромадни шаҳзода хайрия ишларига бағишлаган.
Меган Маркл ва шаҳзода Гарри
Британия қироллик оиласи мухлислари Меган ва Гаррининг қироллик оиласидаги ҳаётлари ҳақидаги шов-шувли фильмларини яхши эслашади — ва, албатта, улар буни бепул қилмаган. Манбаларга кўра, 2020 йилда Netflix ва Сассекслар 100 миллион долларлик шартнома имзолашган. Лойиҳалардан бирида “Гарри ва Меган” сериалида, герцог ва герцогиня ўз шахсий видеоларини улашиб, қироллик оиласи аъзолари сифатида бошдан кечирган “кураш” ҳақида сўзлаб беришган. Инсайдерларнинг фикрича, 2024 йилда Гарри ва Меган ушбу платформа учун яна бир фильм чиқаришади.
Меган Маркл, шунингдек, уч йилга 30 миллион долларлик Spotify шартномасини ҳам имзолаган. Унга кўра, Меган таниқли шахслар иштирокида аёлларнинг ҳуқуқлари ҳақида “Арчетйпес” подкастларини ёзиб бориши керак эди — масалан, Перис Ҳилтон, Серена Уильямс ва Минди Калинг унинг меҳмони бўлган. Аммо кейинчалик маълум бўлдики, герцогиня шартномада кўзда тутилганидан анча камроқ подкаст ёзган, шу сабабли Spotify топ-менежери Билл Симмонс жуфтликни “фирибгарлар” деб атаган.
Сассексларнинг яна бир катта даромади Гаррининг “Захира” номли мемуарлари сотилиши билан боғлиқ. Мутахассисларнинг ҳисоб-китобларига кўра, шаҳзода ушбу китобдан 20 миллион доллар даромад қилган ва китоб Amazonъда бесцеллердан бирига айланган.
Изоҳ (0)