“Золушка учун уч ёнғоқ” фильмидаги Золушка ва Шаҳзоданинг суратга олиш майдончасидаги севгиси қандай якунланган?

“Золушка учун уч ёнғоқ” киноэртаги премераси бўлиб ўтгандан сўнг, турли мамлакатларнинг миллионлаб йигитлари чех актрисаси Либуше Шафранкова ижросидаги нафис ва жозибадор Золушкага ошиқ бўлиб қолишди. Қизлар эса ўз навбатида шаҳзода — Павел Травничеканинг истеъдодига мафтун бўлишди.

Кўзни қамаштирадиган жуфтлик

“Уч ёнғоқ” фильмини суратга олишни бошлаган режиссёр Золушка ролига 19 ёшли Либуше Шафранковани тасдиқлайди. Унга ёш актрисанинг нафақат чиройи, балки етарлича кучли характерга эга эканлиги ёқади: бундай Золушка ўзини камситишга йўл қўймайди ва ёвуз ўгай онанинг тазйиқларига муносиб жавоб бера олади.

Энди асосий қаҳрамонга муносиб шаҳзодани топиш керак эди. Режиссёр Вацлав Ворличек номзодларни қайта-қайта рад этаверади, боиси ҳеч бири тўғри келмасди. Унга “иккинчи Ален Делон” керак эди, у шунчалик келишган бўлсинки, бош қаҳрамонлар жуфтлиги кадрда нафақат яхши, балки кўзни қамаштирувчи даражада кўринсин. Ниҳоят, Ворличек Театр академиясининг 23 ёшли битирувчиси Павел Травничекани кўриб қолади. Йигитнинг Моравия вилоятига хос шеваси бўлиб, у отда юришни ҳам билмасди. Энг муҳими, Павел ҳақиқатан ҳам эртаклардаги шаҳзодага ўхшарди.

Кўп ўтмай, томошабинлар телеекранлар қаршисида ҳаяжондан қотиб қолишди. Улар сўзамон, бир зумда ўгай онаси, синглиси ва ҳатто Шаҳзоданинг ўзини ҳам жойига қўя оладиган жасур ва довюрак Золушкага мафтун бўлишди. Либуше Шафранкова қишки қор босган далаларда отда дадил чопиб, оғир арбалетдан ўқ узадиган, ҳазил-мутойибага уста, ўзини ҳимоя қила оладиган Золушка ролини маҳорат билан ижро этди. Бу сафарги Золушка ўзига ишонган, ҳозиржавоб ва кучли қиз эди.

Совуқ ўрмондаги жўшқин муҳаббат

Эртакни эътибор билан кузацангиз, асосий қаҳрамонлар шунчаки рол ўйнамаётганини, балки кадрда яшаётганини сезиш мумкин. Улар бир-бирларига жуда самимий нигоҳ ташлашарди, бу ерда фақат актёрлик маҳоратининг ўзи етарли эмасди. Либуше ҳам, Павел ҳам тез-тез шу мавзуда саволларга дуч келишарди. Ҳаммани қизиқтирган нарса: улар ўртасида ишқий муносабат бўлганмиди? Бироқ артистлар журналистларнинг қатъий саволларига жавоб бермай, фақат сирли табассум билан чекланишарди.

Бу сир очилмай қолиши ҳам мумкин эди. Бироқ кўп йиллар ўтиб, томошабинларнинг қизиқиши бир оз сўнгач, Травничека ниҳоят суратга олиш жараёнида бир-бирларига кўнгил қўйганларини тан олади. Улар ишдаги танаффусни сабрсизлик билан кутишарди: севишганлар барча танаффусларни қишки ўрмонда биргаликда сайр қилиб ўтказишган.

“Ҳаво жуда совуқ эди. Мен -20 даража совуқда юпун кийимда эдим, лекин Либуше билан бир-биримизни иситиб турардик”, деб эслайди актёр суҳбат чоғида.

Аммо суратга олиш ишлари тугаши билан ҳиссиётлар ҳам сўнади. Афтидан, муносабатлар унчалик кучли ва жиддий бўлмаган. Кейинчалик Шафранкова ва Травничека яна бир бор “Учинчи шаҳзода” эртагида севишганлар ролини ўйнашади. Аммо бу вақтга келиб гўзал Либуше аллақачон турмушга чиққанди.

Шаҳзоданинг тўрт хотини

Травничеканинг ўзи ҳам кўп ўтмай уйланади. Бироқ қисқа вақтдан кейин ажрашади. Санъаткорнинг кейинги икки никоҳи ҳам ажралиш билан якунланади. Ўзининг сода феъл-атвори туфайли Павел учала собиқ турмуш ўртоғи билан ҳам яхши муносабатларни сақлаб қолади, ОАВ маълумотларига кўра, унинг тўнғич ўғли ҳақида бундай деб бўлмайди. Уни отаси билан гаплшишни истамайди. Павел Травничека ҳам бу мавзуда ҳеч қандай изоҳ бермаган — ўғли ҳақидаги саволлар унга ёқмайди.

Тўртинчи хотини билан эса бахтли ҳаёт кечирмоқда. Моника Фиалкова 20 йилдан бери унинг ёнида, 2017 йилда улар ўғилли бўлиб, унга Максимилиан деб исм қўйишади. Ҳозирда “Золушка учун учта ёнғоқ” эртагидаги машҳур Шаҳзода 74 ёшда, Моника эса ундан 34 ёш кичик. Павел театрда фаолиятини давом эттирмоқда.

Золушканинг ягона муҳаббати

Гўзал Золушка масаласига келсак, Либуше Шафранкова фильмдаги ишини тугатгандан сўнг кўп ўтмай, у учун севимли ва ягона - бир умрлик ҳақиқий шаҳзодасини учратади. Унинг исми Йозеф Абрагам бўлиб, Шафранкова ишлаган театр актёри эди. Йозеф ундан 13 ёш катта аммо шунга қарамай уларнинг муносабати яхши эди.

Бир муддат ўтгач, улар турмуш қуриб, ўғил фарзанд кўришади. Либуше уни севимли эри шарафига Йозеф деб атайди. У кинода рол ижро этишни давом эттиради, эртак-фильмларида бир неча бор малика ролларини ўйнайди, бироқ фильмографиясида жиддий драматик роллар ҳам бор. Актриса жамоат олдида кўп кўринмайди — у эри билан дабдабали тадбирларни ёқтирмас, бўш вақтларини оила даврасида ўтказишни афзал кўради. Мухлислар учун Либуше Шафранкова ва Йозеф Абргам оилавий бахт тимсоли эди: улар бир-биридан ҳатто икки кунга ҳам ажрала олмас, агар кетиш керак бўлса, ролини рад этар ва имкон қадар доим бирга бўлишга ҳаракат қилишарди. Гўё тақдир уларга ҳамиша ҳам меҳрибон бўлавермаслигини олдиндан сезгандай эдилар.

Қайғули якун

Либуше ва Йозеф 45 йил бирга яшади. Кейин эса бирин-кетин қайғули кунлар бошланади. Аввалига эри юрак касаллигига чалинади. Кейин актрисанинг ўзига ўпка саратони ташхиси қўйилади. Эри ҳар доим ёнида бўлган, хотинидан ажралмаган, ҳамма нарсада ёрдам берган ва қўллаб-қувватлаган. Улар муаммоларни кенг жамоатчиликка ошкор қилишмасди — ўзлари ҳал қилишарди ва фақат энг яқинларигина Либуше нима учун омма олдида кўринмай қолганини билишарди.

2021 йил ёзида болалигимизнинг гўзал Золушкаси, чехиялик актриса Либуше Шафранкова вафот этди. У 68 ёшга тўлганидан икки кун ўтиб, оламдан ўтди. Унинг мухлислари эса севимли актрисаларини кўргиси келганда “Золушка учун учта ёнғоқ”, “Учинчи шаҳзода” ва унинг иштирокидаги бошқа фильмларни қайта томоша қилишади — экранда Либуше яна жонланади, табассум қилади, шаҳзода билан ҳазиллашади, балда рақсга тушади ва қорли ўрмонда от минади.