Қорақалпоғистоннинг Нукус шаҳрида Cobalt ҳайдовчиси мактаб ўқувчисини уриб, қочиб кетди. Бу ҳақда “Миллар” дастурида хабар берилди.
Унга кўра, ҳолат 4 февраль куни содир бўлган. Ҳайдовчи пиёдани уриб, воқеа жойидан қочиб кетган ҳолати эса машиналарнинг кузатув камераларига тушиб қолган. У ўз айбига иқрорлик билдириб, қўрққани сабабли кетиб қолганини айтди.
“Нукус шаҳридаги кўчадан кетаётган пайтимда мактаб ўқувчисини кўрмасдан уриб юбордим. Тўғриси, қўрққанимдан воқеа жойидан қочиб кетдим. Бошқа бу каби қоидабузарлик қилмасликка ваъда бераман”, дейди ҳайдовчи.
Ҳозирда автомашина топилиб, жарима майдончасига жойлаштирилган. Ҳодиса юзасидан суриштирув ишлари давом этмоқда.
- Аввалроқ Тошкент шаҳар Яшнобод туманида Captiva уриб юборган пиёда воқеа жойида ҳалок бўлганди.
- Шунингдек, Самарқандда “КамАЗ” аёл ва унинг икки фарзандини уриб юбориши оқибатида болалар воқеа жойида ҳалок бўлгани тўғрисида хабар берилган эди.
Бундан ташқари, 19 январь куни Навоийда 16 ёшли бола отасининг машинасида ЙПХ ходимини уриб юбориб, унинг ўлимига сабабчи бўлганди.
Ўзбекистонда 2024 йилда 26 мингдан ортиқ шахс йўл ҳаракатини бузиб, ўзгаларга жабр етказгани учун жавобгарликка тортилди. 2024 йили жами 9364 та йўл-транспорт ҳодисаси расман қайд этилгани ҳақида хабар берилганди.
Йўлларда болалар ўлими
Ноябрь ойида Жиззах вилоятининг Бахмал туманида Cobalt катта тезликда вояга етмаган икки қизни уриб юборди. Шунингдек, Самарқандда автобус мактаб яқинида йўлни кесиб ўтаётган болани уриб юбориб, унинг ўлимига сабаб бўлганди. Сурхондарёда 1-синф ўқувчиси Nexia уриб юборишидан вафот этганди.
Сенат берган маълумотга кўра, 2024 йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган. 2023 йилда болалар билан боғлиқ 1 794 та ЙТҲ юз бериб, уларда 1 568 нафар бола жароҳатланган, 263 нафари вафот этган.
Сентябрда Тошкентда BYD 9 ёшли мактаб ўқувчисини уриб юбориб, унинг ўлимига сабабчи бўлганди. Худди шу каби ҳолат июль ойида Навоий вилояти Хатирчи туманида содир бўлган. Катта тезликда ҳаракатланаётган BYD пиёдалар ўтиш жойидан ўтаётган 9 ёшли қизалоқни босиб кетган. Ўша ойда Самарқандда 7 яшар бола автомобиль уриб кетиши оқибатида вафот этди. Апрелда Жиззахда содир бўлган ЙТҲ оқибатида икки нафар мактаб ўқувчиси ҳалок бўлди.
Болалар иштирокида аянчли ЙТҲлар кўпайгач, жамоат фаоллари йўлларда болалар ўлими учун сиёсий жавобгарлик бўлиши кераклигини айтди.
Изоҳ (0)