Тошкент вилоятида пиёдани уриб юбориб, воқеа жойидан қочиб кетган юк машинаси эгаси қидирилмоқда. Бу ҳақда Тошкент вилояти ИИББ ЙҲХБ матбуот хизмати «Дарё»га маълум қилди.
Маълумотларга кўра, 17 декабрь куни соат 02:00 ва 03:00 лар орасида А-373 Гулистон—Оҳангарон автомобиль йўлининг Пискент тумани ҳудудидан ўтган 87-километрида, яъни ёқилғи қуйиш шохобчаси атрофида номаълум транспорт воситаси 25-28 ёшлар атрофида бўлган пиёдани уриб юборган. Ҳайдовчи жабрланувчига ёрдам кўрсатмасдан воқеа жойидан қочиб кетган.
Пиёда олинган тан жароҳатлари оқибатида вафот этган. Марҳумнинг шахсига аниқлик киритилган — у Олмалиқ шаҳрида яшовчи 36 ёшли эркак бўлган.
Воқеа содир бўлган жойни ўрганиш асосида у ердан юк машинасига тааллуқлилиги тахмин қилинаётган бир неча ашёвий далиллар топилган. Йўлнинг асфальт қопламасидаги тормоз излари ҳам юк машинасига тегишли эканлиги тахмин қилинмоқда. Ҳозирда ушбу транспорт воситасини топиш бўйича қидирув ва суриштирув ишлари олиб борилмоқда.
Тошкент вилояти ИИББ ЙҲХБ ушбу воқеани кўрган ёки эшитган фуқаролардан (71) 265-08-51 ёки 265-96-53 телефон рақамларига қўнғироқ қилиб маълумот беришларини, жиноятни фош этилишига ҳисса қўшишларини сўрайди. Таъкидланишича, маълумот берган фуқароларнинг шахси ошкор этилмайди ва сир сақланади.
«Шунингдек, воқеани содир этган ҳайдовчи айбига иқрор бўлиб, ички ишлар органига келса, у ўзига нисбатан қўлланиладиган жазони енгиллаштириш имконига эга бўлади», дейилади хабарда.
Мавзуга доир:
Изоҳ (0)