Тошкентда пиёда уриб юборилишига сабаб бўлган йўл-транспорт ҳодисасини юзага келтириб, воқеа жойидан қочиб кетган Spark ҳайдовчисининг шахсини аниқлаш чоралари кўрилаётгани тўғрисида хабар берилганди. Пойтахт ИИББнинг маълум қилишича, мазкур автомобиль ҳайдовчиси топилган ва машина жарима майдонига жойлаштирилган.
Ижтимоий тармоқларда Spark автомобили йўл қоидасини бузган ҳолда, асосий йўлдан ҳаракатланиб кетаётган машина устуворлигини эътиборга олмасдан қайрилиб олаётгани тасвирланган видео тарқалган эди. Маълум қилинишича, видеода тасвирланган ҳолат 3 октябрь куни, тахминан, соат 11:00 да Бектемир тумани ТҲАЙ кўчасида содир бўлган. Spark’нинг бу каби ҳаракати натижасида Cobalt автомобилининг 49 ёшли ҳайдовчиси К.К. тўқнашувни четлаб ўтмоқчи бўлиб, рулни ўнг томонга бурган ва пиёда — 1987 йилда туғилган П.Б.ни уриб юборган. Оқибатда пиёда бадан шикастлари билан шифохонага етказилган.
Тезкор-тергов тадбирлари давомида аниқланишича, воқеа жойини тарк этган Spark автомобилини ҳайдовчилик гувоҳномаси бўлмаган 39 ёшли С.И. исмли аёл бошқарган.
Ҳозирга вақтда унга нисбатан Маъмурий жавобгарлик тўғрисидаги кодекснинг тегишли моддалари бўйича баённома расмийлаштирилган ва автомобиль жарима майдончасига жойлаштирилган.
«Мазкур факт асосида олиб борилган терговолди ҳаракатлари давом этмоқда. Фактлар аниқлангач, йўл-транспорт ҳодисаси барча иштирокчиларининг ҳаракатларига ҳуқуқий баҳо берилади», — дейилади хабарда.
Аввалроқ Қашқадарёда пиёда ўлимига сабабчи бўлган Nexia ҳайдовчиси воқеа жойидан яширингани, Андижонда Spark икки нафар вояга етмаган қизни уриб кетгани тўғрисида хабар берилганди.
Мавзуга доир:
Изоҳ (0)