Ўзбекистон олтин-валюта захиралари 2025 йил 1 январь ҳолатига кўра 41,18 миллиард долларни ташкил этди. Бу ҳақда Марказий банк маълумотларида келтирилган.
Мамлакатнинг Ўзбекистон ялпи халқаро захиралари 2024 йилнинг декабрь ойида 290 миллион долларга камайди. Хусусан, ой давомида олтин нархининг 2664,30 доллардан 2610,85 долларгача камайишининг таъсири -656 миллион долларни ташкил этди.
Олтин захиралари қиймати 704,4 миллион долларга — 32,7 миллиард доллардан 32,03 миллиард долларгача пасайди. Унинг физик ҳажми эса 12,3 миллион трой унсия (382,57 тонна) даражасида ўзгаришсиз қолди. Захираларнинг валюта қисми эса аксинча, 413,9 миллион долларга кўпайган ва 8 597,7 миллион долларни ташкил этган.
Йиллик ҳисобда захиралар қиймати 6,6 миллиард долларга ошди (2024 йил 1 январда 34 миллиард 564,6 миллион доллар эди).
“Айтиш керакки, 2024 йилда халқаро захираларнинг йиллик кўпайиши олтин нархи омилига боғлиқ бўлди. Агарда 2024 йил бошидаги котировкалар сақланиб қолганида, захиралар қолдиғи йиллик камайиши тўхтамаган бўларди”, дейди иқтисодчи Отабек Бакиров.
Марказий банк томонидан сотиб олинган қимматли қоғозларнинг қиймати бир оз — 101,7 миллион долларгача ошди.
Изоҳ (0)