O‘zbekistonda 17-yanvardan og‘irligi 100 gramm bo‘lgan oltindan tayyorlangan o‘lchovli quymalar tijorat banklari orqali sotuvga chiqariladi. Bu haqda Markaziy bank matbuot xizmati xabar berdi.
Ma’lum qilinishicha, MB aholining investisiya va jamg‘arish imkoniyatlarini yanada oshirish hamda qimmatbaho metallar muomalasini kengaytirish maqsadida 5, 10, 20, 50 grammli o‘lchovli oltin quymalarga qo‘shimcha ravishda ushbu quymalarni sotuvga chiqarmoqda.
Qayd etilishicha, quymalar maxsus himoya qadoqlarida sotuv uchun taqdim etiladi.
Oltin quymalarning qadog‘i sertifikat vazifasini bajarib o‘z seriya raqamiga ega bo‘ladi. Oltin quymalarning sotish narxlari har kuni Markaziy bankning rasmiy veb-saytida milliy valyutada e’lon qilib boriladi.
Qadoqlari but oltin quymalar sotuv shoxobchalarida quyma egasiga to‘lovni amalga oshirish orqali qaytarib sotib olinadi.
Qadog‘i buzilgan yoki texnik talablarga mos kelmaydigan oltin quymalarni qaytarib sotib olish ularni texnik ekpertizadan o‘tkazish orqali amalga oshiriladi va ekspertiza o‘tkazilgandan so‘ng to‘lov to‘lab beriladi.
Qadog‘i but holatdagi oltin quymalarni O‘zbekiston hududidan tashqariga olib chiqishga ruxsat beriladi.
Izoh (0)