Ўтган сутка давомида Украинадаги жангларда 610 нафар россиялик ҳарбий ҳалок бўлди, дея хабар бермоқда Украина Қуролли кучлари Бош штаби. Идора 17 май куни эрталаб эълон қилган ҳисоботга кўра, Россиянинг кенг кўламли босқини бошидан бери Украинада ҳалок бўлган россиялик ҳарбийлар сони 200 590 кишига етди.
Бош штаб маълумотларига кўра, 2022 йил 24 февралдан буён Украина ҳарбийлари Россиянинг жами 3 771 та танкини, 7 365 та зирҳли техникаси, 3 166 та артиллерия тизими, 318 та ҳаво мудофаа тизими, 308 та самолёт, 294 та вертолёт, 2 748 та дрон, 982 та қанотли ракета, 18 та кема, 6 067 та автомобиль ва 417 та махсус техникасини йўқ қилган.
Украина Қуролли кучларининг ўз йўқотишлари ҳақидаги маълумотлар ошкор этилмаган.
Россия Мудофаа вазирлиги охирги марта 2022 йил 21 сентябрда урушдаги йўқотишлар ҳақида расман ҳисобот берган эди. Ўшанда вазирлик 5 937 нафар россиялик ҳарбий ҳалок бўлганини эълон қилган.
Апрель ойида The New York Times АҚШ разведка хизматларининг интернетда тарқалган ҳужжатларига таяниб, Россия Федерал хавфсизлик хизмати мамлакат Мудофаа вазирлигини “Россиянинг Украинадаги йўқотишларини яширганликда айблаётгани” ҳақида хабар берганди. Разведка хизмати маълумотларига кўра, вазирлик ўз ҳисоботларида Миллий гвардия жангчилари, “Вагнер” ёлланма аскарлари ва Чеченистондан Украинага юборилган ҳарбийлар орасидаги йўқотишларни ҳисобга киритмаяпти. ФХХ версиясига кўра, Украинада ўлдирилган ва яраланган Россия ҳарбийлари сони тахминан 110 минг кишини ташкил қилади.
Изоҳ (0)