“АҚШ афғон халқининг мулкини мусодара қилишга ҳаққи йўқ” — “Толибон”

“Толибон” Мудофаа вазирлиги Ўзбекистонга 2021 йил афғон ҳарбийлари томонидан олиб ўтилган авиатехникалар Афғонистонга қайтарилмаслигига қарши чиқди. Бу ҳақда Hasht-e Subh Daily хабар берди.

Вазирлик баёнотига кўра, АҚШ Афғонистон халқининг мулкини “мусодара қилиш ҳуқуқига эга эмас”.

“Ўзбекистондаги афғон вертолётлари ва самолётлари тақдирига оид ҳар қандай келишув қабул қилиниши мумкин эмас. Тошкент яхши қўшничиликни инобатга олиб, оқилона қарор қабул қилиши ва Афғонистон ҳарбий-ҳаво кучларига тегишли самолётларни топширишда ёрдам бериши керак”, дейилади баёнотда.

“Толибон” Ўзбекистон ҳукуматидан бу масалада ҳар қандай келишувдан воз кечишни сўраган. Аввалроқ АҚШнинг Ўзбекистондаги элчиси Жонатан Ҳеник икки давлат Афғонистоннинг собиқ армиясига тегишли самолётлар тақдири бўйича келишувга эришганини ва ҳарбий техникалар Тошкентда қолишини эълон қилганди. Элчи авиатехникалар АҚШга тегишли эканини таъкидлаган.

Ўзбекистонга олиб ўтилган авиатехникалар

2021 йил август ойида “Толибон” Кобулни эгаллаб, ўша пайтдаги президент Ашраф Ғани мамлакатдан кетганида афғон ҳарбийлари самолёт ва вертолётда Ўзбекистонга қочиб ўтган. Ўзбекистон президентининг Афғонистон бўйича махсус вакили Исматилла Эргашев Ўзбекистонга собиқ афғон учувчилари томонидан олиб ўтилган самолёт ва вертолётлар “Толибон” ҳаракатига қайтарилмаслигини таъкидлаган.

Эргашевнинг сўзларига кўра, авиатехникаларни АҚШ ҳукумати сотиб олиб берган ва Афғонистон собиқ ҳукуматига вақтинчалик фойдаланиш учун топширган. Собиқ ҳукумат бу учоқларга бир доллар ҳам сарфламаган.

Сиёсатчи афғон самолётлари Ўзбекистонга кирган пайт чегарада бўлиб, воқеанинг бевосита иштирокчисига айланганини айтган. У жараён Ўзбекистон суди ҳукмига биноан қарор қилиниши, лекин воситаларни олиб кетиш Америка ихтиёрида эканини таъкидлаган.

• Статистик маълумотларга кўра, Афғонистон ҳукумати ўзгариши даврида Тожикистон ва Ўзбекистонга аввалги ҳукуматнинг 80 дан ортиқ ҳарбий учоқлари олиб ўтилган.
• 2023 йил бошида маршал Абдурашид Дўстум ушбу авиатехникаларни Афғонистон қаршилик фронтига топширишга чақирганди.
• Яқинда Ўзбекистон ва АҚШ расмийлари афғон ҳарбийлари томонидан фойдаланилган авиатехникалар борасида ўзаро келишувга эришди.
• АҚШ нега бундай қарорга келганини экспертлар тушунтирди, ҳавола орқали бу ҳақда маълумот олишингиз мумкин.